Maqtaaral aýdanynda topan sýdan zardap shekken úilerdiń qujattary jinaqtalyp, saraptama jumystary júrgizilýde. Bul týraly búgin Maqtaaral aýdany ákiminiń orynbasary Beisembai Tórebekov málimdedi, dep habarlaidy "Ult aqparat".
Beisembai Tórebekovtiń aitýynsha, Firdaýsi jáne Órgebas aýyldary turǵyndarynyń «Úkimet qarjy berse, ózimiz úi salyp alar edik» degen ótinishi talqylaný ústinde. Al, Alisher Ýsmanovtyń jeke qorynan bólingen 5 mln 200 myń AQSh dollary evakýatsiialanǵan aýyl turǵyndaryna beriletinin aitty.
«Aýdanymyzda 5202 otbasy myń dollardan qarjylai kómek alatyny belgili boldy. Onyń ishinde páter jaldap turyp jatqan jáne úrei qushaǵynda psihologiialyq kúizeliske túsken azamattar da bar. Iaǵni, bul kómek páterdiń iesine emes, sol úidi jalǵa alyp turyp jatqan turǵyndarǵa úlestiriletin bolady», - deidi B.Tórebekov.
Brifing barysynda aýdan ákiminiń orynbasary topan sýdan zardap shekken úilerdi baǵalaý jumystary arnaiy qurylǵan komissiia anyqtaitynyn jetkizdi. Iaǵni, olar qai úidi qaita salý nemese kúrdeli jóndeý kerek ekenin naqtylaityn bolady. Sondai-aq, ol bir aýlada 2-3 úi ornalasqan jaǵdaida jer teliminiń qalai bólingeni eskeriledi. Iaǵni, turǵyndardyń árqaisysyna bólgende 8 sottyqtan teń bólinse jáne qujattary túgel bolsa ǵana Úkimetten qarjy bólinip, úi turǵyzylatyn bolady.
«Qazirgi tańda aýdanda topan sýdan zardap shekken aýyl azamattarynan úidiń, maldyń, egistik alqaptarynyń qujattary jinaqtalýda. Osy maqsatta aýdan ákimdigi men evakýtsiialyq beketterde mamandardan quralǵan arnaiy jumysshy top qyzmet etýde. Budan bólek, aýdanda sý astynda qalǵan aýyldardaǵy áleýmettik nysandardyń, atap aitqanda mektep, balabaqsha, mádeniet úii, meditsinalyq pýnkterdiń qazirgi ahýaly saralanýda»,- dedi aýdan ákiminiń orynbasary.
