Maqtaaraldaǵy tehnogendik apattyń saldaryn joiý úshin Shymkent qalasynan kelgen 35748 áskeri bólimi kásibi merekesinde tolarsaqtan saz keship, qyzyl sý basqan aimaqtan tabyldy, dep habarlaidy "Ult aqparat" óńirlik kommýnikatsiialar qyzmetine silteme jasap.
112 adamnan turatyn topty atalǵan áskeri bólim basshysynyń qarý-jaraq jónindegi orynbasary, podpolkovnik Rahmatýlla Taspolaev bastap kelgen. Olar sý astynda qalǵan eldimekenderdi tazalaý jáne halyqqa kómek berý jumystaryn júrgizip jatyr.
Jol talǵamaityn 20 KamAZ tehnikasyn ala kelgen áskeri bólim qyzmetkerleri men veterinarlyq qyzmet jáne ákimdik ókilderimen birge sý basqan eldimekender ishine kirip, aman qalǵan jan-janýarlardy, zattardy halyqqa jetkizýge kómek berip jatyr. Bul tehnikanyń mal shyǵynyn esepteýde de róli úlken.
Áskeriler adam aiaǵy bara almaityn jerlerge kedergisiz baryp, tabylǵan mal ólekselerin qurǵaq jerge tasýda. Eldimekenderge top-toppen bólingen sarbazdar 6 kún boiy bailaýly turǵan buzaýdy sý qursaýynan aman alyp shyǵyp, veterinar mamandarǵa tabystady.
Budan bólek, mamandar Atakent aýylyndaǵy kómek qolyn qajet etken qoimalarǵa baryp, júk túsirýge de járdem berýde.
Qyzý jumysqa kirisken mamandar kúni keshe Órgebas aýylynda 10 júk kóligine tielgen qumdy qapqa salyp, uzyndyǵy 1,5 shaqyrym bolatyn damba turǵyzdy.
