Maqtaaral aýdanynda jalpy kólemi 7639 gektar aýyl sharýashylyǵy jerleri zaqymdanǵan. Al mal shyǵyny - 297 bas, dep habarlaidy óńirlik kommýnikatsiialar qyzmeti.
Barlyq shyǵyndar eseptelip, Úkimetke usynyldy. Aldaǵy ýaqytta ótemaqy jasalady. Bul týraly óńirlik kommýnikatsiialar qyzmetin ótken brifingte oblystyq aýyl sharýashylyǵy basqarmasynyń basshysy Nurbek Badyraqov málimdedi.
«Aýdanda 11 eldimekenniń egistikteri zaqymdanǵan. Jalpy 1 myńnan astam aýyl sharýashylyǵy taýar óndirýshileriniń tizimi jasaldy. Biz 7639 gektar egistiktiń shyǵynyn 4 mlrd 1 mln teńge kóleminde eseptep, Úkimetke usyndyq. Komissiia sheshimi boiynsha ár daqyl túrine orai ótemaqy jasalady. Al veterinariialyq jaǵdai boiynsha 297 mal zardap shekken: 58 bas siyr, 227 qoi-eshki, 16 jylqy, 2 túie jáne 227 úi qustary sýǵa aqqan. Barlyǵyn joiý jumystary júrip jatyr. Mal shyǵynyn óteý úshin naryqtaǵy baǵa boiynsha 32 mln teńge shyǵyndy eseptep, usynyp otyrmyz», - dedi basqarma basshysy.
Basqarma mamandary ólgen ár maldyń fotosyn túsirip, aktisin daiyndaýda. Mal men eginniń ótemaqysy tótenshe jaǵdaiǵa bailanysty ashylatyn azamattardyń jeke shotyna aýdarylady. Qosymsha shot ashýdyń qajeti joq.
Sý tartylǵannan keiin aýyl sharýashylyǵy ministrliginen arnaiy mamandar kelip, jerdiń quramyn, zaqymdanǵan kúiin tekseredi.
