Túrkistan oblysy Maqtaaral aýdany Myrzakent kentindegi qurylys alańy dezinfektsiialandy, dep habarlaidy "Ult aqparat".
Óńirlik kommýnikatsiia qyzmetiniń málimetinshe, bul sharalar ártúrli infektsiialyq aýrýlardyń el ishinde taralýyna jol bermei, dalaly jerde kezdesetin qan sorǵysh jándikterdi joiýǵa baǵyttalǵan.
Bul týraly aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń bólim basshysy Gaýhar Sáýlebekova málimdedi.
«Qazirgi tańda Myrzakent kentinde jańa eldi meken boi kóterip, onda 500-den astam úi salynyp jatqany barshaǵa belgili. Osyǵan bailanysty qaýip-qaterdiń aldyn alý úshin dezinfektsiialap jatyrmyz. Dalaly jerlerde kene, búrge siiaqty ziiandy jándikter jii kezdesetini belgili. Sondyqtan qurylysshylardyń jáne bolashaqta osynda kóship keletin halyqtyń qaýipsizdigi úshin profilaktikalyq sharalar qajet», – deidi Gaýhar Shyrynqyzy.
Qurylys alańyna arnaiy daiyndalǵan dárini shashý úshin 3 maman jumyldyrylǵan.
Aita keteiik, buǵan deiin arnaiy qural-jabdyqpen qamtamasyz etilgen qyzmetkerler sý basqan Firdoýsi jáne Órgebas aýyldarynda zalalsyzdandyrý jumysyn júrgizgen bolatyn.
Aldaǵy kúnderi qalǵan eldi mekenderde de profilaktikalyq sharalar qolǵa alynady.
