Ońtústik Qazaqstanda oblysynda halqy eń tyǵyz ornalasqan Maqtaaral jáne Saryaǵash aýdandaryn bólý týraly másele sońǵy jyldary jii qozǵalyp keldi. Al búgin altynshy shaqyrylymyndaǵy oblystyq máslihattyń HH sessiiasynda atalǵan usynys kún tártibinde qaralyp, depýtattardan qyzý qoldaý tapty. Sessiiany qorytyndylaǵan oblys ákimi Janseiit Túimebaev halyq kútken tarihi sheshimdi negizdeý úshin tiisti aýqymda sharalardyń júrgizilgenin jetkizdi. Bul týraly OQO ákiminiń baspasóz qyzmeti habarlady.
Sessiia tóraǵalyq jasaǵan D.Ábish qaralatyn máselelerdi habarlap, bólinýge bailanysty atqarylǵan jumystar týraly oblys ákiminiń birinshi orynbasary Á.Óserbaev baiandama jasady.
«2018 jyldyń 16 aqpanynda Saryaǵash jáne Maqtaaral aýdandarynyń ókildi jáne atqarýshy organdarynyń aýdan aýmaǵyn bólý jolymen aýdandar qurý, olarǵa ataý berý, ákimshilik ortalyqtary men shekaralaryn belgileý týraly birlesken sheshimderi qabyldandy. Osyǵan orai, Maqtaaral aýdanyn úsh aýdanǵa iaǵni, Maqtaaral, Asyqata, Jetisai, Saryaǵash aýdanyn eki aýdanǵa iaǵni, Saryaǵash, Keles dep bólip, burynǵy aýdan ortalyqtaryn qaita qalpyna keltirý usynylady», - dedi.
Sessiiada sóz alǵan oblystyq máslihat depýtaty Sádý Bekenov Maqtaaral aýdany 1997 jyly 24 sáýirde burynǵy úsh aýdandy biriktirý nátijesinde qurylǵanyn aityp, tarihi usynysty Myrzashól jurty ystyq yqylaspen qabyldap otyrǵanyn jetkizdi.
«Maqtaaral aýdany oblystaǵy halqy tyǵyz shoǵyrlanǵan jáne demografiialyq ósimi jaǵynan joǵary aýdan sanalady. Mundaǵy jalpy halyq sany 304 684 adamdy qurap otyr. Aýdan 182 eldi mekennen, 1 qala, 3 kent jáne 20 aýyldyq okrýginen quralǵan. Sondyqtan Maqtaaral aýdanyn úshke bólý sheshimi Elbasydan qoldaý taýyp, aldaǵy ýaqytta atalǵan óńirlerdiń áleýmettik ekonomikalyq hal-aqýaly jaqsara túsetini sózsiz. Jyl kóleminde jumys tobyn quryp, barlyq qajetti sharalardy júrgizgen oblys ákimi J. Túimebaevqa rizalyǵymyzdy bildiremiz», - dedi Sádý Kettebaiuly.
Al, Saryaǵash aýdany 1997 jyly burynǵy Saryaǵash jáne Keles aýdandaryn biriktirý jolymen qurylǵan. Atalǵan aýdanda búginde 326 915 halyq turady. Aýdan aýmaǵy 762203 gektar, 154 eldi mekeni, 1 qala, 1 kent jáne 23 aýyldyq okrýginen quralǵan.
«Búgingi usynysty tarihi sát dep baǵalaýǵa bolady. Atalǵan aýdandarda qazirgi tańda 630 myńnan astam halyq turyp jatyr. Bul elimizdegi ózge oblystardyń halyqymen salystyrǵanda edáýir kóp sanalady. Endi usynysymyz Elbasy tarapynan tolyq qoldaý taýyp jatsa, eki aýdandaǵy halyqqa memlekettik qyzmet kórsetý júktemesi azaiyp, ákimshilik aýmaqtaǵy barlyq baǵyttaǵy jumystardyń sapasyn kóterýge óz septigin tigizedi dep esepteimin» , - dedi Janseiit Qanseiituly.
Atalǵan eki aýdanda halyqtyń tyǵyz ornalasý sebebinen kásipkerlikti, aýyl sharýashylyǵyn óz deńgeiinde damytý úshin memleket tarapynan beriletin qoldaýlardy halyqqa jetkizý, tolyq jáne sapaly qamtý máseleleri áli de bar. Densaýlyq saqtaý salasynda, atap aitqanda, der kezinde meditsinalyq kómek kórsetý, shalǵaida ornalasqan eldi meken turǵyndaryn aýdan ortalyǵyndaǵy aýrýhanalar men perzenthanalarǵa jedel jetkizý máselesi de tolyq qamtýdy qajet etedi.
Jańa qurylatyn aýdandarǵa ataý berý máselesi respýblikalyq onomastika komissiiasynyń qaraýyna usynylmaq. Maqtaaral aýdanynyń ákimshilik ortalyǵy Myrzakent kenti, Asyqata aýdanynyń ákimshilik ortalyǵy Asyqata kenti, Jetisai aýdanynyń ákimshilik ortalyǵy Jetisai qalasy bolyp belgilenip otyr.
Al Saryaǵash aýdanynyń ákimshilik ortalyǵy - Sayraǵash qalasy, Keles aýdanynyń ákimshilik ortalyǵy retinde Abai aýyly belgilendi.
