Túrkistan oblysynda sý tasqynynan zardap shekken turǵyndarǵa bes mobildi Halyqqa qyzmet kórsetý ortalyqtary kómek kórsetýde, dep habarlaidy "Ult aqparat".
Málim etilgendei, «Azamattarǵa arnalǵan úkimet» memlekettik korporatsiiasynyń Basqarma tóraiymy Ásemgúl Baltashevanyń tapsyrmasymen tótenshe jaǵdai saldarynan evakýatsiialanǵan Maqtaaral aýdanynyń turǵyndaryna qujattaryn qalpyna keltirýge kómektesý úshin 5 mobildi top jiberildi.
«Barlyq qajetti quraldarmen jabdyqtalǵan memlekettik korporatsiianyń mobildi HQO-lary aýdan boiynsha ornalasqan 24 evakýatsiialaý pýnktin kezekpen aralaidy. Mamandar zardap shekken jergilikti turǵyndarǵa memlekettik qyzmetter boiynsha quqyqtyq keńes berip, qujattaryn qalpyna keltirý úshin ótinish qabyldaidy. Bul rette turǵyndardy qujattandyrý boiynsha migratsiialyq qyzmet basqarmasymen jáne basqa da atqarýshy organdarmen jedel túrde yqpaldasý uiymdastyrylǵan», - dedi «Azamattarǵa arnalǵan úkimet» memlekettik korporatsiiasynan.
Mobildi top birinshi jumys kúni 150-den asa adamǵa memlekettik qyzmetter boiynsha keńes bergen. Evakýatsiialaý pýnkterinde maqtaaraldyqtardyń joǵalǵan qujattaryn qaita rásimdeýge ótinishter qabyldanyp jatyr.
«Esterińizge sala keteiik, osydan bir jyl buryn Arys qalasyndaǵy áskeri qoimada bolǵan jarylysqa bailanysty tótenshe jaǵdai kezinde de memlekettik korporatsiia qyzmetkerleri jumysyn toqtatpai, jergilikti ákimdikpen birlese shtabtarda, dalalyq jaǵdaida apattan zardap shekken azamattardyń qujattaryn retke keltirý úshin úzdiksiz qyzmet etti. Tótenshe jaǵdai kezinde arystyqtarǵa HQO mamandary 17 myń qyzmet kórsetti», - dedi korporatsiiadan.
