Nurlyjol, Órgebas, Yrysty jáne Jantaqsai aýyldarynyń aýmaǵynda uzaqtyǵy 22 shaqyrym ýaqytsha bógetter salyndy, Myrzakent aýylyna qarai úsh kollektor ornatylǵan, qum salynǵan 86 myń qap qoiyldy. Nurlyjol, Jańaturmys, Firdoýsi, Órgebas, Dostyq jáne Jeńis aýyldarynda sý sorý jumystary jalǵasýda, sý basqan aýmaqtardan barlyǵy 6,1 tekshe metr sý sorylǵan, dep habarlaidy "Ult aqparat" QR IIM TJK baspasóz qyzmetine silteme jasap.
Budan basqa, Jeńis jáne Firdoýsi aýyldarynda Túrkistan oblysy TJD men Apattar meditsinasy ortalyǵynyń psihologtary zardap shekken turǵyndarǵa psihologiialyq kómek kórsetýde.
Qoǵamdyq tártipti qamtamasyz etý úshin Jańaturmys, Firdoýsi, Órgebas jáne Jantaqsai aýyldarynda tórt blok beket qoiylǵan.
Túrkistan oblysynyń apat ornynda Ózbekstan Respýblikasy IIM, QM, jergilikti atqarýshy organdar, TJM-nen jalpy 1626 adam, 324 tehnika birligi, 17 júzý quraly, 216 sý sorǵyzý tehnikasy jumyldyrylǵan.
Kómekke kelgen qaraǵandylyq qutqarýshylar Maqtaaral aýdanynyń Firdoýsi aýylynda apattyq-qutqarý jumystaryn júrgizip, motosorǵylardyń kómegimen sýdy tartyp alýda. Qaraǵandylyq qutqarýshylar apat ornyna kelgeli 70 myń tekshe metr sý sorǵylanǵan.
Eske sala ketsek, Maqtaaral aýdanyndaǵy bes eldi mekeninde (Jańaturmys, Jeńis, Firdoýsi, Órgebas, Dostyq aýyldary) 1030 turǵyn úidi sý basyp otyr. Olardyń turǵyndary týystarynyń úiin jáne Maqtaaral aýdanynda qurylǵan 10 evakýatsiialyq pýnkte (Atakent-3 kenti, Órkeniet-1 aýyly, Esentai-1 aýyly, Igilik-1 aýyly, Qyryqjyldyq-2 aýyly, Kókaral-1 aýyly, Jetisai-1 aýyly) panalaýda, olarda 3252 adam ornalastyrylǵan.
