Sońǵy ýaqytta barlyq sala sekildi politsiia qyzmeti de qarbalasqa toly. Dúniejúzin dúrbeleńge salǵan pandemiia bizdiń elimizge de eleýli salqynyn tigizdi. Qaterli indetten saqtaný maqsatynda elimizdiń iri qalalary, barlyq eldi mekenderde blokpostar qoiyldy.
Ol oryndarda quzyrly sala mamandary táýlik boiyna tynymsyz qyzmet atqaryp, halyqtyń saýlyǵyn saqtaý jolynda tynymsyz eńbek etti. Solardyń qatarynda Qyzylorda oblysy Jalaǵash aýdanynda jol politsiiasy ákimshilik praktika tobynyń memlekettik inspektory qyzmetin atqaratyn ál-Farabi Ten bar, dep habarlaidy QazAqparat.
Qazaly aýdanynda 1992 jyly dúniege kelgen ol 2017 jyldan beri Jalaǵash aýdanynda politsiia qyzmetinde eńbek jolyn bastady. Sodan beri jaýapty qyzmette jemisti eńbek etip keledi. Eldiń ishi bolǵannan keiin túrli jol-kólik oqiǵasy kezdesedi. Sondai sátterde ol máseleniń anyq-qanyǵyn naqtylaý maqsatynda óz mindetin atqarady.
«Bizdiń qyzmetimiz ońai emes. Keide jol-kólik oqiǵasynyń neden bolǵanyn anyqtaý qiynǵa soǵady. Nátijesinde oqiǵaǵa kináli adamdy anyqtaimyz. Olarǵa tiisti sharalar qoldanamyz. Politsiianyń negizgi mindetterine osylaisha zor jaýapkershilikpen qaraimyz. Men bul salany beker tańdaǵan joqpyn. Jaýapkershiligi zor mamandyq ekenin de bilemin. Bala kezimnen politsiia qyzmetine qyzyǵa qaraityn edim. Qazir ózim de sol jumystyń ortasynda júrmin. Maqsatym - politsiia qyzmetinde tiisti mindetterimdi abyroimen oryndap, qyzmette zor tabystarǵa jetý. Men buryn sportpen ainalystym. Taekvondodan túrli jarystarǵa qatystym. Qara belbeý iegeri atandym», - deidi ol.
Ál-Farabidiń ata-anasy - qarapaiym jandar. Ákesi - Aleksandr Qazaly aýdanynda aldymen mádeniet salasynda qyzmet atqarǵan. Mýzykalyq aspaptyń barlyq túrin meńgergen. Ulty – korei bolsa da qazaq halqynyń salt-dástúrin jaqsy meńgerdi. Keiinnen aýdandyq aýrýhanada mehanik bolyp eńbek etti. 2012 jyly dúnieden ozdy. Anasy – Tamaranyń ulty qazaq, aýdanda memlekettik saqtandyrý inspektsiiasynda qyzmet atqaryp, búginde zeinet demalysyna shyqty.
«Ata-anamyz bizge ónegeli tárbie berdi. Otbasynda tórt perzent tárbieledi. Keibirimizdiń esimimizdi qazaqsha qoidy. Bizdiń úide menen basqa Irina, Ainur esimdi eki qyz jáne Radik esimdi baýyrym bar. Ákemniń aqylymen biz islam dinin qabyldadyq», - dedi ol.
Ol karantin kezinde blokposta jumystyń ońai bolmaǵanyn aitady. Bul álemdi jailaǵan qaterli indettiń aldyn alý baǵytynda jasalǵan úlken jumys dep sanaidy.
«Bul oń sheshim boldy dep sanaimyn. Sonyń nátijesinde elimiz naqty nátijege qol jetkizdi. Ol indettiń betin qaitarýǵa zor septigin tigizdi. Iá, indet álem jurtshylyǵyn áli de oilandyryp tur. Oǵan selsoq qaraýǵa áste bolmaidy. Barlyq azamattardan qaýipsizdik sharalaryn saqtaýyn suraimyn», - dedi ol.
