Aýyl ákimderin sailaýǵa arnalǵan úgit-nasihat jumystary barysynda ADAL partiiasynan usynylǵan úmitkerler 2087 adamnyń qatysýymen 329 kezdesý ótkizdi. Kezdesýler barysynda aýyl turǵyndary muń-muqtajyn aityp, problemalardy kóterip qana qoimai, túitkil máselelerdiń qalai sheshiletinine qatysty suraqtar qoiýda.
Mysaly, Shyǵys Qazaqstan oblysynyń Almasai aýyldyq okrýgi ákimine kandidat Saiat Týarbaevpen kezdesýde aýyl turǵyndary qoi sharýashylyǵynyń damytýǵa jaiylymdyq jerlerdiń jetispeýi, sýbsidiialardyń azdyǵy, internet jáne mobildi bailanystyń nasharlyǵyna qatysty másellerdi kóterdi.
Almaty oblysy Uiǵyr aýdany Avat aýyldyq okrýgi ákimine kandidat Gojahmet Kadirovqa turǵyndar tarapynan aýyz sý tapshylyǵyna qatysty másele aitylǵan (aýyldaǵy 550 úidiń 387-si sýmen jabdyqtalmaǵan).
Túrkistan oblysy Qazyǵurt aýdany Syntas aýylynyń turǵyndary ADAL partiiasy atynan úmitker Jorahan Álimqulovqa jem-shóp pen mal baǵýǵa jaiylym jerlerdiń tapshylyǵyn jetkizgen.
Joǵaryda atalǵan máselelerdi jekelei sheshý maqsatynda Partiianyń ortalyq apparatynda Jobalyq keńse qurylyp, onda bilikti mamandar partiia atynan sailaýdan ótken ákimder arqyly aýyl damýyna keshendi sharalardy iske asyratyn bolady.
Osy Jobalyq ofis aiasynda sailanǵan ákimmen birge jaiylym jerdiń tapshylyǵyn sheshý úshin qoldanystaǵy jerdiń búkil aýmaǵyna reviziia júrgizý, paidalanylmaityn jerlerdi qaitarý, aýyl turǵyndarynyń malyn jaiý úshin qajetti jerlerdiń kólemin ulǵaitý josparlanýda.
Aýylda bilikti mamandardyń tapshylyǵyn joiý úshin egjei-tegjeili saýalnama júrgizip, taldaý jasap, sonyń nátijesinde aýylǵa naqty qansha maman kerektigin anyqtaý. Odan keiin, «Eńbek» baǵdarlamasy boiynsha qysqa merzimdi kýrstar, jumys istep jatqan sharýa qojalyqtarynda praktikadan ótýdi uiymdastyrý, «Diplommen aýylǵa» baǵdarlamasy boiynsha jas mamandardy tartý máselelerin iske asyrý da qolǵa alynady.
Sonymen qatar, aýyz-sý tapshylyǵyn sheshý úshin biýdjet qarajatyn mindetti túrde bólý jóninde sharalar qabyldanbaq. Óz kezeginde ADAL partiiasynyń ortalyq apparaty árbir biýdjettik ótinim úshin esepteýlermen jáne ekonomikalyq áserin taldaýmen negizdeme ázirlep, ákimderge naqty kómek kórsetpek oida.
Osylaisha, kandidattardyń halyqpen kezdesýlerde aitylǵan problemalardy kezeń-kezeńimen sheshý jolǵa qoiylmaq.
