Halyq ártisi Maqpal Júnisova Qazaqstanda buryn-sońdy Dimashtai ánshiniń bolmaǵanyn aitady. Osy ýaqytqa deiin qazaqstandyqtar shetel sahnasynda án shyrqaǵanymen, jeke án keshin bergender sirek.
"Dimashtai azamat myń jylda bir ret týatyn shyǵar. Ol, shynymen de, qazaq halqynyń mańdaiyna bitken jaryq juldyz desem, artyq aitqanym emes. Dimashty qaitalaýdyń qajeti joq, ol — ýnikým, dara tulǵa", — dedi ánshi Astana arnasynyń "Syrlasý" baǵdarlamasynda.
Sondai-aq, Maqpal Júnisova Dimashtyń Qazaqstanda júrip birden baǵyn asha almaǵanyna toqtaldy. Muny bir kezderi ózi de ata-anasyna eskertken eken. Aitýynsha, Qazaqstanda Dimashtai ánshini qabyldamaidy. Munymen qatar, ol kezinde biraz otandyq ánshi shetelde tanylǵanymen, internet damymaǵandyqtan, olar týraly videolar az ekenin aitty.
"Dimash qazir Maikl Djekson siiaqty halyqaralyq deńgeide kontsertter berip júr. Bul qazaqtarda bolmaǵan nárse. Bizde "Halyqaralyq ánshimin" dep búkil álemdi jaýlap alǵandai sóileitinder bar. Biraq eshkim bulai shetelde jeke kontsert berip kórmegen", — dedi Maqpal Júnisova.
Ári qarai halyq ártisi ózi men áriptesteriniń shetelge tek 300-500 adamǵa kontsert qoiý úshin barǵanyn aityp berdi. Onyń ózinde árqaisysy 4-5 óleńmen shekteletin bolǵan.
"Dimashpen qatty maqtanyp jatyrmyz. Reseidiń ózi birtúrli bolyp, ne isterin bilmei júr. Qudai til-kózden saqtasyn. Shynymen de, Dimashtyń daýysy 6 oktavaǵa jetip qaldy. Kúndelikti ózin baptap, Alla bergen daýysyn durys paidalanyp júr", — dedi ol.
Munymen qatar, Maqpal Júnisova Álibek Dinishev, Ermek Serkebaev syndy ánshilerdiń de ózindik orny bar ekenin aityp ótti. Alaida memleket tarapynan olarǵa durys qoldaý kórsetilmegen.
