Astana qalasy, Saryarqa aýdandyq №2 sotynda alaiaqtyq boiynsha aiyptalyp otyrǵan belsendi Mahambet Ábjannyń isine qatysty tyńdaý bastaldy, dep habarlaidy "Ult aqparat".
Kýáger retinde shaqyrylǵan Ábjannyń burynǵy serigi, ultshyl-patriot Maqsat Nurypbaev aiypker Ábjanmen «Antigeptil» qozǵalysyn birlese júrgizý kezinde tanysqanyn aitty. Sózine qaraǵanda Maqsat búginde «Ata-kent» turǵyn úi kooperativiniń múshesi, biraq sońǵy bir jylda onyń jumysyna qatyspaǵan. Sonymen qatar ol keiingi bir ishinde Ábjanmen habarlaspaǵany, qazir onyń nemen ainalysatyny týraly bilmeitinin málimdegen. Muny ol úsh ai buryn tergeý barysynda da aitqan.
Ári qarai Maqsat Nurypbaev buryn «Asar» respýblikalyq qoǵamdyq birlestigi tóraǵasy bolǵan Qairat Bodaýhannyń búginde «Ata-kent» kooperativin basqaratynyn aitty.
Osy jerde prokýror onyń sózin bólip, aldyn ala tergeý hattamasynan úzindi oqydy. Odan belgili bolǵan nárse, Maqsat munyń aldynda «M.Ábjan úleskerler arasynda Bodaýhan úleskerlerdiń aqshasyn alyp shetelge ketpek degen málimet taratty» dep kýálik bergen. Iaǵni, Maqsattyń aitýynsha, Ábjan úleskerlerge Bodaýhan senderdiń aqshalaryńdy alyp qashyp ketkeli júr degen áńgime taratqan. Osy jalǵan málimet taratýǵa bailanysty Maqsat Nurypbaevtyń Ábjanmen qarym-qatynasy buzylǵan. Tergeýshi odan Ábjandy «otyrǵyzý» úshin qajet kýálikter berýdi suraǵan. Óz sózine qaraǵanda, Maqsat jalǵan kýálik berýden tartqan, biraq tergeýshiniń kei dáiekterimen kelisken. Óitkeni, ol kezde kóńil-kúiim nashar, ári sharshap turǵan edim dedi ol. Tergeýshi ózine qysym jasamaǵanyn málimdedi. Al Ábjan maqsatyna jetý úshin arazdyq týǵyzý ádisin qoldandy dep kýálik bergenin rastady.
Odan keiin aiyptalýshy Ábjan kýáger Maqsattan Bodaýhannyń kooperativ basshysy bolyp qalai sailanǵanyn týraly sotqa baiandap berýdi surady. Kýáger bul jóninen habarsyzbyn dedi.
Bodaýhan munyń aldynda sapasyz qurylys materialdaryn alǵany úshin Nurypbaev kooperativ quramynan shyǵaryldy dep kýálik bergen. Aiyptalýshy kýágerden osy máseleni naqtylaýdy surady. Nurypbaev ol shyndyqqa sáikes kelmeidi dep jaýap berdi.
Tyńdaý kezinde anyqtalǵan taǵy bir nárseni aita ketken jón. Kýáger Nurypbaev tergeý kezinde aiyptalýshynyń jeke basyn jaqtyrmaimyn degen. Alaida, protsess barysynda ol bul sózinen bas tartty. Tergeý orys tilinde júrdi, men qazaqsha jaýap berdim, aýdarmashy bolmaǵany sebepti tergeýshi meniń sózimdi durys túsinbedi dedi ol.
Ári qarai kýálik bergen Nurypbaevtyń sózine qaraǵanda, Ata-kent» músheleri bolmaǵandyqtan Ahmedzada Jáńgir men Mahambet Ábjan kooperativ jumysyna qatyspaýy kerek edi. Úleskerler óz múddesin qorǵaýdy Ábjan men Jáńgirge tapsyrǵanyn bilmedim, óitkeni, kooperativ sheshimderi múshelerdiń jalpy jinalysynda qabyldanýy tiis dedi ol.
Nurypbaevtyń aitýynsha, 2016 jylǵa deiin Bodaýhan kooperativ jumysyna K.Meiramnyń senimhaty boiynsha qatysyp kelgen, odan keiin tóraǵa bolyp sailanǵan.
Budan ári sottyń suraýy boiynsha Nurypbaevty tergeý kezinde túsirilgen video kórsetildi. Nurypbaev sotqa qatysýshy azamattyq belsendiler jáne ultshyl patriottar aldynda abyroiynan aiyrylmaý úshin tergeýshiniń Ábjanǵa qatysty orys tilinde qoiǵan suraqtaryn túsinbedim degen. Alaida, videoda Nurypbaev Ábjandy burynnan jaqtyrmaimyn, ol adamdardy aldaýǵa tyrysatyn dep ashyq aitady. Sonymen qatar videoda Nurypbaevtyń tergeýshi suraqtaryna orys tilinde jaýap berip otyrǵany kórsetiledi.
Tergeý versiiasy boiynsha, Mahambet Ábjan Ońtústik Qazaqstan oblysy Aqsýkent aýyly turǵyny Ǵalymjan Panovqa «aldyn ala bir million teńge berseńiz, «Ata-kent» turǵyn úi-qurylys kooperativinen úsh bólmeli páter ala alasyz» degen. Nátijede Panov 972 myń teńge ziian shekken.
