QR Energetika Maǵzum Myrzaǵaliev Úkimet otyrysynda elimizdiń soltústigi men shyǵysyndaǵy oblystardy gazdandyrýdyń eki joly qarastyrylyp otyrǵanyn aitty, dep habarlaidy QazAqparat.
«Búgingi tańda eldi gazdandyrý úlesi 54,3 paiyzdy qurap otyr. Nátijesinde 10,2 mln adam gazǵa qol jetkizdi. «Nur-Otan» partiiasynyń sailaýaldy tuǵyrnamasyna sáikes, 2025 jylǵa deiin eldi gazdandyrý úlesi 60 paiyzdy quraýy kerek. Sonyń arqasynda 11,7 mln adam gazǵa qol jetkizedi», - dedi ministr.
Vedomstvo basshysynyń aitýynsha, búgingi tańda «Saryarqa» magistraldik gaz qubyry Nur-Sultan, Qaraǵandy, Temirtaý, Jezqazǵan qalalarynda kómirdi paidalanyp kelgen 70 myńǵa jýyq úidi gazben qamtamasyz etýge múmkindik beredi. Al Aqmola oblysynda 13 joba iske asyrylyp, nátijesinde 16 myń úi gazǵa qol jetkize alady.
«Petropavl, Kókshetaý, Óskemen, Semei, Pavlodar qalalary búgingi tańda gazdandyrylmaǵan. Sonymen qatar, atalǵan qalalardy gazben qamtamasyz etýdiń kelesidei joldary bar. Atap aitsaq, «Saryarqa» magistraldyq gaz qubyryn jalǵastyrý nemese Resei Federatsiiasynan magistraldyq gaz qubyrlaryn tartý. Jyl sońyna deiin «Gazprom» men «QazTransGaz» elimizdiń soltústik jáne shyǵys óńirlerin gazdandyrý boiynsha esepteý júrgizip, tiimdi nusqasyn ázirleidi» - dedi Maǵzum Myrzaǵaliev.
