Qytaimen sý resýrstaryn bólý máselesine qatysty óte kúrdeli kelissózder ótip jatyr. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«Qazaqstan men Qytai Halyq Respýblikasy arasyndaǵy sý qatynastary Transshekaralyq ózenderdi paidalaný jáne qorǵaý salasyndaǵy yntymaqtastyq týraly úkimetaralyq kelisimmen retteledi. Búgingi kúngi negizgi problema - Transshekaralyq ózenderdiń sý resýrstaryn bólý jónindegi kelisimniń bolmaýynda», - dedi ol Senatty ótip jatqan Úkimet saǵatynda.
Ministrdiń aitýynsha, negizi kelisim boiynsha jumys 2015 jyldan bastalǵan. Kirispeden jáne 31-baptan turatyn biryńǵai qurylym kelisildi.
«Qytaimen óte kúrdeli kelissózder ótedi. Qytai shekara mańyndaǵy eshbir elmen sý bólý jóninde kelissózder júrgizbeitinin erekshe atap ótkim keledi. Qazaqstan Qytaimen kelissózder júrgizip jatqan alǵashqy jáne jalǵyz el bolyp sanalady. Jalpy biz Kelisimge transshekaralyq ózenderdiń ekojúiesin saqtaý máselelerin engizýdi talap etýdemiz. Qytai tarapy buǵan múddeli emes. Oǵan qaramastan otandyq sarapshylardyń tabandylyǵynyń arqasynda ótken jyly taraptardyń sý resýrstaryna quqyqtaryn keshendi qaraý jáne transshekaralyq sý obektileriniń ekojúielerin saqtaý boiynsha qytai tarapymen ýaǵdalastyqqa qol jetkizildi. Kelissózder jalǵasýda», - dedi Maǵzum Myrzaǵaliev.
Onyń dereginshe, Qazaqstannyń 8 sý sharýashylyǵy basseininiń jeteýi transshekaralyq bolyp sanalady. Sonyń saldarynan elimiz shektes elderdiń, atap aitqanda Qytaimen, Qyrǵyzstanmen, Ózbekstanmen jáne Resei Federatsiiasymen sý sharýashylyǵy saiasatymen tyǵyz bailanysty.
Aita keteiik, QR Parlamenti Senaty tóraǵasynyń orynbasary Asqar Shákirovtiń tóraǵalymen ótip jatqan Úkimet saǵaty «Qazaqstannyń sý qaýipsizdigi: qazirgi kezdegi qaýip-qaterler jáne olardy sheshý perspektivalary» taqyrybyna arnalǵan. Senat spikeriniń orynbasary kirispe sózinde sýǵa qatysty máseleler Úkimet pen jergilikti biliktiń baqylaýynda bolýy tiistigin, sýmen qamtamasyz etý infraqurylymyna tolyq aýdit júrgizý qajettigin basa aitty.
