Qazaqstandyq aýyr atlet, álemniń tórt dúrkin chempiony Ilia Ilin óziniń aldaǵy ýaqyttaǵy josparlarymen bólisti, dep habarlaidy QazAqparat tilshisi.
«Bolashaq josparlarym týraly aityp ótkim keledi. Qazirgi dene qalpymnyń kúii jaman emes. Salmaǵym - 101-103 keli aralyǵynda. Biz salmaq kategoriialaryn kútip otyrmyz. Iaǵni, bir aidan keiin álemdik aýyr atletikada qandai salmaqta óner kórsetetinim belgili bolady», - deidi sportshy OKQ-da ótken baspasóz máslihatynda.
Sportshy qazirgi ýaqytta salmaqty ne ósirip, ne kemitip almaýdy baqylap júrgen kórinedi.
«Jumada julqi kóterýde 172 kelini, serpe kóterýde 212 kelilik kórsetkishti kórsettim. Qazirgi kezeńde jaǵdai jaqsy. Bapkerimniń maǵan kóńili tolyp otyr. Álbette, 22 jyldyq sporttyq mansabym bolǵandyqtan, aiaqqa salmaq túsip, jaraqat alyp qalatyn kezderim bar. Bul árine qalypty nárse. Biraq, jalpy meniń oiymsha, jaǵdaiym 90 paiyzǵa jaqsy. Ary qarai jaqsara beredi degen oidamyn», - deidi ol.
Ilinniń aitýyna qaraǵanda, qyrkúiek aiynda Qazaqstan chempionaty bolady.
«Men sonda óner kórsetýge bel býyp otyrmyn. Bárine de shart birdei: barlyǵymyz Qazaqstan chempionatynan ótip, Álem chempionatyna barýymyz kerek. Sol syndardy baǵyndyrsaq, Tokio Olimpiadasyna litsenziiany alamyz. Ázirge maqsatym - Qazaqstan chempionatyn utý. Tolyq daiynmyn. Jeńisti qalaimyn. Maǵan tek jeńis kerek», - dedi Ilia Ilin.
