قازاقستاندىق اۋىر اتلەت, ەلەمنٸڭ تٶرت دٷركٸن چەمپيونى يليا يلين ٶزٸنٸڭ الداعى ۋاقىتتاعى جوسپارلارىمەن بٶلٸستٸ, دەپ حابارلايدى قازاقپارات تٸلشٸسٸ.
«بولاشاق جوسپارلارىم تۋرالى ايتىپ ٶتكٸم كەلەدٸ. قازٸرگٸ دەنە قالپىمنىڭ كٷيٸ جامان ەمەس. سالماعىم - 101-103 كەلٸ ارالىعىندا. بٸز سالماق كاتەگورييالارىن كٷتٸپ وتىرمىز. ياعني, بٸر ايدان كەيٸن ەلەمدٸك اۋىر اتلەتيكادا قانداي سالماقتا ٶنەر كٶرسەتەتٸنٸم بەلگٸلٸ بولادى», - دەيدٸ سپورتشى وكق-دا ٶتكەن باسپاسٶز مەسليحاتىندا.
سپورتشى قازٸرگٸ ۋاقىتتا سالماقتى نە ٶسٸرٸپ, نە كەمٸتٸپ الماۋدى باقىلاپ جٷرگەن كٶرٸنەدٸ.
«جۇمادا جۇلقي كٶتەرۋدە 172 كەلٸنٸ, سەرپە كٶتەرۋدە 212 كەلٸلٸك كٶرسەتكٸشتٸ كٶرسەتتٸم. قازٸرگٸ كەزەڭدە جاعداي جاقسى. باپكەرٸمنٸڭ ماعان كٶڭٸلٸ تولىپ وتىر. ەلبەتتە, 22 جىلدىق سپورتتىق مانسابىم بولعاندىقتان, اياققا سالماق تٷسٸپ, جاراقات الىپ قالاتىن كەزدەرٸم بار. بۇل ەرينە قالىپتى نەرسە. بٸراق, جالپى مەنٸڭ ويىمشا, جاعدايىم 90 پايىزعا جاقسى. ارى قاراي جاقسارا بەرەدٸ دەگەن ويدامىن», - دەيدٸ ول.
يليننٸڭ ايتۋىنا قاراعاندا, قىركٷيەك ايىندا قازاقستان چەمپيوناتى بولادى.
«مەن سوندا ٶنەر كٶرسەتۋگە بەل بۋىپ وتىرمىن. بەرٸنە دە شارت بٸردەي: بارلىعىمىز قازاقستان چەمپيوناتىنان ٶتٸپ, ەلەم چەمپيوناتىنا بارۋىمىز كەرەك. سول سىنداردى باعىندىرساق, توكيو وليمپياداسىنا ليتسەنزييانى الامىز. ەزٸرگە ماقساتىم - قازاقستان چەمپيوناتىن ۇتۋ. تولىق دايىنمىن. جەڭٸستٸ قالايمىن. ماعان تەك جەڭٸس كەرەك», - دەدٸ يليا يلين.
