Prezidenttiń bes áleýmettik bastamasy aiasynda shaǵyn nesielendirýge qosymsha 20 mlrd teńge bólingen bolatyn. Alaida atalǵan qarjyny igerý sharalary baiaý atqarylyp keledi, dep xabarlaidy QazAqparat.
QR Eńbek jáne xalyqty áleýmettik qorǵaý ministri Mádina Ábilqasymovanyń aitýynsha, qalalarda shaǵyn nesieler 6 mlrd teńgege, al aýyldy jerlerde 14 mlrd-qa ulǵaidy. Osylaisha, shaǵyn nesielendirýdiń jalpy somasy 62 mlrd teńgege jetti. Sonyń ishinde 45 mlrd - aýyldarǵa, 17 mlrd qala turǵyndaryna arnalǵan.
«Jyl basynan beri shaǵyn nesielendirý boiynsha barlyǵy 38 mlrd teńge, sonyń ishinde qalalarda 10,5 mlrd, al aýyldarda 28 mdrd teńge igerildi. Ol jospardyń 60 protsentin quraidy. Qarajatty igerý jaǵynan Almaty qalasy, Almaty oblysy, Batys Qazaqstan, Jambyl, Shyǵys Qazaqstan jáne Soltústik Qazaqstan oblystarynda jaqsy kórsetkishter baiqalyp otyr. Al artta qalyp kele jatqan óńirlerdiń ishinde Mańǵystaý, Atyraý, Aqtóbe oblystary jáne Astana qalasy bar», - dedi M.Ábilqasymova.
Osy oraida, Úkimet basshysy Baqytjan Saǵyntaev Prezidenttiń tapsyrmasyn baiaý oryndap jatqan aimaqtardy synǵa alyp, qarjyny der kezinde igerýdi tapsyrdy. Ákimder jyldyń aiaǵyna deiin barlyq qarajatty igerip shyǵýǵa ýáde etti. "Endi, jyldyń aiaǵyna deiin oryndalatynyna senemiz. Biraq bul bastama naýryz aiynda jariialandy. Qazir qazannyń ortasy boldy. Kásipkerler áli kútip otyr. Sonda olar Prezident tapsyrmasynyń oryndalǵanyn bir jyl boiy kúte me? Ol durys emes. Memleket basshysynyń tapsyrmasy ýaqytynda oryndalýy qajet. Negizi, bárimizge syn. Úkimetke de, ákimdikterge de, Atamekenge de. Qarjy berildi. Tapsyrma bar, áli igerilmei jatyr. Osy aidyń ishinde barlyq problemalar sheshilýi kerek», - dep atap kórsetti B.Saǵyntaev.
Aita keteiik, Memleket basshysy ózin-ózi jumyspen qamtyǵan jáne jumyssyz júrgen azamattardyń arasynda jappai kásipkerlikti damytý sharalaryn jalǵastyrýdy tasyrǵan bolatyn. Osyǵai orai, jeńildetilgen shaǵyn nesielerge bólinetin qarjynyń jalpy somasy 62 milliard teńgege jetti. Sonyń nátijesinde shaǵyn nesie alatyndardyń sany eki esege ósedi degen jospar bar.
