Elimizde jyl basynan bergi 9 aidyń ishinde 327 myń adam turaqty jumysqa ornalasqan. Bul týraly Úkimet otyrysynda QR Eńbek jáne halyqty áleýmettik qorǵaý ministri Mádina Ábilqasymova málim etti, dep habarlaidy QazAqparat tilshisi.
Mádina Ábilqasymova óz baiandamasynda Eńbek jáne halyqty áleýmettik qorǵaý ministrligi «Eńbek» nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasynyń jobasyn ázirlegenin atap ótti.
««Eńbek» baǵdarlamasy memlekettik baǵdarlama retinde qaita bekitiledi. Baǵdarlamada onyń qoldanystaǵy tetikteriniń tiimdiligin arttyrý jáne jańa sharalarmen tolyqtyrý maqsatynda keshendi ózgerister kózdelgen. Memlekettik baǵdarlamanyń negizgi maqsaty - eńbek resýrstarynyń bilimin arttyrý, jappai kásipkerlikti damytý jáne ózin-ózi jumyspen qamtyǵandardy, jumyssyzdardy nátijeli jumysqa ornalastyrý bolyp tabylady», - deidi ol.
Mádina Ábilqasymovanyń aitýynsha, atalmysh baǵdarlamany iske asyrý úshin 112,9 mlrd teńge bólingen. Jyldyń sońyna deiin osynyń aiasynda 571 myń azamatty jumyspen qamtý sharalaryna tartý kózdelgen.
«Osy jyldyń 9 aiynyń qorytyndysy boiynsha 82,5 mlrd teńge (73 paiyzy) igerildi. Qazandaǵy jaǵdai boiynsha qoldanystaǵy baǵdarlamany iske asyrýdyń arqasynda 563 myń adamdy jumyspen qamtý sharalaryna tartýǵa jol ashylǵan. Naqtyraq aitqanda, 458 myń adam jumysqa, onyń ishinde 327 myń adam turaqty jumysqa ornalastyrylǵan», - deidi Mádina Ábilqasymova.
Ministr atap ótkendei, baǵdarlamanyń birinshi baǵyty eńbek naryǵynda suranysqa ie mamandyqtar men daǵdylar boiynsha jappai oqytýdy kózdeidi. Tegin tehnikalyq jáne kásiptik oqytý sheńberinde osy jyldyń 1 qyrkúieginen bastap 20 myń adam oqýǵa kirisken. Qazandaǵy jaǵdai boiynsha 40 myńǵa jýyq baǵdarlamaǵa qatysýshy qysqa merzimdi oqytýǵa jiberilgen.
