QR Mádeniet jáne sport ministrligi janynan Geraldika ortalyǵyn qurý usynyldy, dep habarlaidy "Ult aqparat".
Bul týraly Memlekettik hatshy Qyrymbek Kósherbaev búgin elordada ótken Memlekettik rámizder men nagradalar geraldikasy jónindegi respýblikalyq komissiia otyrysynda aitty.
«Bul jumysty úilestiretin kez keldi. Munda biryńǵai memlekettik standarttar bolýy tiis. Árkimniń óz betinshe jumys isteýi durys emes. Barlyq vedomstvolar osy erejelerge súienetin bolady. Táýelsizdik alǵanymyzǵa 29 jyl boldy. Sondyqtan bul másele pisip-jetildi dep oilaimyn. Dál osy Geraldika ortalyǵy naqty bir usynystardy maquldaý nemese bas tartý boiynsha memlekettik komissiiaǵa usynymdar engizýi kerek», - dedi ol.
Qyrymbek Kósherbaev Mádeniet jáne sport ministrligine 2019 jyldyń 1 jeltoqsanyna deiin ministrlik janynan Geraldika ortalyǵyn qurý týraly usynys ázirleýdi tapsyrdy.
Sonymen birge, Memlekettik hatshy Qazaqstan oblystary, Nur-Sultan, Almaty jáne Shymkent qalalarynyń ákimderine Qazaqstan halqy Assambleiasynyń hatshylyǵymen birlesip, barlyq oblystar men qalalarda Memlekettik rámizderdi nasihattaý ortalyqtaryn ashý týraly tapsyrma berdi.
Aita keteiik, búgin Aqordada Memlekettik rámizder men vedomstvolyq jáne olarǵa teńestirilgen ózge de nagradalar geraldikasy máseleleri jóninde respýblikalyq komissiia otyrysy ótti.
QR Mádeniet jáne sport ministri Aqtoty Raiymqulova memlekettik rámizderdiń importyna tyiym salýdy usyndy.
Sonymen birge, memlekettik organdardyń vedomstvolyq nagradalarynyń dárejeleri alynyp tastalyp, uqsas nagradalar biriktiriledi.
