Mádeniet jáne sport ministrliginiń qyzmetkerleri úsh sanatqa bólinip, jumys kestelerine ózgeris engizildi, dep habarlaidy QazAqparat.
«Elimizde tótenshe jaǵdaidyń engizilýine bailanysty ministrlik pen oǵan baǵynyshty uiymdar boiynsha jedel shtabtar quryldy. Turaqty jumys rejimin qamtamasyz etý maqsatynda mamandardyń úsh sanaty anyqtaldy. Birinshi sanat – jumys oryndarynda mindetti túrde bolýǵa jáne uiymdardyń tynys-tirshiligin qamtamasyz etýge tiisti adamdar. Ekinshi sanat – qyzmetti qashyqtyqtan tys istei alatyn mamandar. Úshinshi sanat – aqyly nemese aqyly emes eńbek demalysyna jiberý múmkindigi bar adamdar», - dedi Órken Bisaqaev OKQ-da ótken onlain-formattaǵy baspasóz máslihatynda.
Onyń aitýynsha Mádeniet jáne sport ministrligi júktelgen fýnktsiialar men mindetterge sáikes kelesi sharalardy qabyldap jatyr.
«Mádeniet salasynda Qazaqstanda jáne shetelge josparlanǵan gastrolldik qyzmet tolyqtai toqtatyldy. Kontsertter men spektaklder, qoiylymdar, forýmdar men seminarlar, konferentsiialar jáne basqa da is-sharalar toqtatyldy. Sonymen qatar kitaphanalarǵa, murajailarǵa barý, onyń ishinde tarihi, mádeni mura nysandaryna ekskýrsiialar toqtatylatyn boldy. Balalar mýzyka mektebi, bi jáne beineleý úiirmeleri sekildi qosymsha bilim berý uiymdarynyń jumysy da, kinoteatrlardyń qymeti toqtatylady», - dedi ol.
