Intelligentsiia ókilderi, mádeniet jáne sport qairatkerleri koronavirýs infektsiiasynyń aldyn alý úshin qaýipsizdik erejelerin ustanýǵa shaqyryp, video jariialady, dep habarlaidy QazAqparat.
Video Prezident Qasym-Jomart Toqaevtyń el halqyna úndeýin qoldaýǵa baǵyttalǵan.
Olardyń aitýynsha, koronavirýs infektsiiasynyń taralýyna jol bermeý maqsatynda memlekettik organdar tarapynan aýqymdy sharalar qabyldanýda jáne bul qiyndyqty birlese otyryp eńseretin bolamyz.
«Qazaqta sóz bar «saqtansań, saqtaimyn» degen. Bul indetke qarsy el, memleket bolyp qorǵanýymyz qajet. Mundai kezde sasqalaqtap, ushqalaqtyqqa urynyp, indetti kúsheitip almaýymyz kerek. Barynsha tártipke baǵynyp, dárigerlerdiń aitqan nusqaýlyǵyn oryndaiyq. Bul qiyndyqty da birige otyryp eńseremiz», - dedi aqyn Nesipbek Aituly.
«Barys» hokkei komandasynyń shabýylshysy Roman Starchenko óz jankúierlerine osynaý qiyn kezde bir-birine qoldaý kórsetýge shaqyrdy. «Bul – koronavirýs pandemiiasyna orai qabyldanǵan ýaqytsha shara. Biz qashanda sizderdiń qoldaýlaryńyzdy sezinip kelemiz. Biz jaqsy oiyn kórsetip, sizderdi qýantqymyz keledi. Osy kezeńde bizdi, bir-birlerińizdi qoldańyzdar», - deidi hokkeist R. Starchenko.
Qazaqstannyń eńbek sińirgen sport sheberi, Olimpiada oiyndarynyń júldegeri Giýzel Maniýrova memleket tarapynan qabyldanǵan sharalardy qoldaýǵa shaqyrdy. Onyń sózinshe, barlyq sporttyq sharalar toqtatyldy. Alaida, buǵan qaramastan bizdiń sportshylar saiystarda jaqsy nátijeler kórsetý úshin jattyǵyp jatyr. «Qurmetti dostar, qazir koronavirýs álemniń kóptegen elinde taralýda. Men bizdiń elimizde bul indetti jeńetinine senemin. Jeke tazalyqty saqtańyzdar. Qiyndyqty tek birlese otyryp ǵana eńseremiz», - dep atap ótti G. Maniýrova.
