QR Mádeniet jáne sport ministrligi jumysynda 343 mln 900 myń teńgeniń qarjylyq buzýshylyq faktileri anyqtaldy. Ministrliktiń jekelegen biýdjettik baǵdarlamalarynyń iske asyrylýy boiynsha júrgizilgen memlekettik aýdittiń qorytyndysy boiynsha Esep komitetiniń múshesi Talǵat Jaqan osylai dedi, dep habarlaidy "Ult aqparat".
«Atap aitqanda, ministrlik «Qazaq ulttyq horeografiia akademiiasyna» 7,9 mln teńge kóleminde negizsiz qosymsha qun salyǵyn (QQS) aýdarǵan. Ol ýaqytta akademiia QQS tóleýshi bolmaǵan», - dedi Talǵat Jaqan.
Onyń aitýyna qaraǵanda, ministrliktiń jumysynan taǵy birqatar kemshilik tabylǵan.
«Jalpy, aýditorlyq sharalar boiynsha 343 mln 900 myń teńgeniń qarjylyq buzýshylyq faktileri anyqtaldy. Oryndy jospardyń bolmaýynan 20 mlrd 600 mln teńge tiimsiz jumsalǵan. 846 mln teńgeniń memlekettik satyp alýy kezinde buzýshylyqtarǵa jol berilgen. 91 protsedýralyq buzýshylyq bolǵan. Aýdit barysynda ornyna qoiylýy tiis 10 mln 900 myń teńgeniń buzýshylyqtaryn retteý boiynsha sharalar qabyldandy. 333 mln teńgeniń jumysy qalpyna keltirildi. 9 mln 700 myń teńge óteldi. 75 mln 400 myń teńge qaitaryldy. Ákimshilik quqyqbuzýshylyq sipaty bar 28 is ákimshilik óndiris isin qozǵaý úshin ýákiletti organǵa tapsyryldy», - dedi Talǵat Jaqan.
