Mádeniet jáne sport ministrligi Qazaqstan ulttyq quramasynyń Sýrdlimpiadadaǵy oiynyna qatysty pikir bildirdi, - dep habarlaidy "Ult aqparat".
Braziliiada ótip jatqan jazǵy Sýrdlimpiadaǵa ulttyq qurama komandasynan sýrdlimpiadalyq sport túrleri boiynsha 59 sportshy qatysyp jatqany belgili.
Ministrliktiń málimetinshe, QR Ulttyq Sýrdlimpiada komiteti QR zańamasyna qaramastan, óz taraptarynan jariialap birqatar sportshyny, onyń ishinde Qanafin Erkebulandy jarysqa aparǵan.
"Qanafin Erkebulan buryn-sońdy estý qabileti buzylǵan sportshylar arasyndaǵy resmi jarystarǵa qatyspaǵan. Qazaqstan Respýblikasy Ulttyq qurama komandasynyń múshesi emes jáne dene múmkindikteri shekteýli jandarǵa arnalǵan sport uiymdarynda tirkelmegen. QR Mádeniet jáne sport ministrliginde aýdiogramma nátijeleri jáne jalpy sportshynyń densaýlyq jaǵdaiy týraly aqparat joq.
Buǵan qaramastan Ulttyq Sýrdlimpiadalyq komitet Erkebulan Qanafindi óz esebinen jarysqa jiberip, Qazaqstannyń bedeline álemdik sport qoǵamdastyǵynyń aldynda nuqsan keltirdi jáne sporttyq etikalyq qaǵidalardy buzdy", - delingen habarlamada.
Mádeniet jáne sport ministrligi ulttyq qurama komandanyń tizimin qalyptastyrý kezinde 81 kelige deiingi salmaq dárejesinde sýrdo dziýdodan Qazaqstan Respýblikasy chempionatynyń qorytyndysy boiynsha el chempiony Aidos Túgelbaevty engizgenin aitty.
Ministrlik Ulttyq Sýrdlimpiada komitetiniń ústinen arnaiy sot organdaryna shaǵym túsiretinin resmi túrde málimdedi.
Erkebulan Qanafin Braziliiada Sýrdlimpiada oiyndaryndaǵy dziýdo jarysynda Qazaqstan quramasyna altyn medal syilaǵan edi.
