Belgili ánshi Roza Rymbaeva sońǵy bes jylda úkimettik kontsertterge shaqyrylmai júrgenin málim etken edi. Mádeniet jáne sport ministrligi "Qazaqkontsert" memlekettik uiymynyń shtattaǵy ánshisiniń osy sózine qatysty túsinikteme berdi, dep habarlaidy Sputnik Qazaqstan.
"Keńestik jáne qazaq estrada ánshisi, professor, aktrisa, Qazaqstannyń halyq ártisi, halyqaralyq konkýrstardyń laýreaty, qurmet jáne parasat ordenderi men marapattyń iegeri Roza Qýanyshqyzy Rymbaeva mádeniet jáne sport ministrliginiń qoldaýymen jáne uiymdastyrýymen ótken is-sharalarǵa jii qatysyp, óz ónerimen halyqtyń qoshemetine bólenip júr dep tolyqtai aitýǵa negiz bar. Memlekettik is-sharalarda, atap aitqanda, "Evraziia" odaǵynyń ashylýyna orai ótken gala-kontsertte Reseidiń halyq ártisi Iosif Kobzonmen birigip dýet oryndady jáne QR Táýelsizdiginiń 25 jyldyǵyna orai uiymdastyrylǵan kontsertte Qazaqstannyń halyq ártisi Álibek Dinishev, QR Eńbek sińirgen qairatkeri Bekbolat Tileýhanmen birge birigip sahnada óner kórsetti", — deidi ministrliktiń baspasóz qyzmeti.
Sonymen qatar, Roza Rymbaeva "Qazaqkontsert" memlekettik uiymynyń atynan 2018 jyldyń basynan gastroldik saparlarmen oblystardy aralaǵan.
Budan bólek, ministrlik halyq ártisiniń Astananyń 20 jyldyq mereitoiyna orai Mádeniet jáne sport ministrliginiń uiymdastyrýymen 15-16 maýsym aralyǵynda ótken "Voice of Astana" halyqaralyq konkýrsy aiasynda Batyrhan Shúkenovti eske alý keshinde óner kórsetkenin de eske salypty.
Al aldaǵy ýaqytta Rymbaeva Konstitýtsiia kúnine jáne Táýelsizdiktiń 26 jyldyq mereitoiyna orai uiymdastyrylatyn gala-kontsertke qatysady dep josparlanǵan eken.
"Mádeniet jáne sport ministri Arystanbek Muhamediuly Roza Rymbaevanyń ónerine erekshe qarap, repertýaryndaǵy kóptegen ánderin súiip tyńdaidy. Sonymen birge, aldaǵy ýaqytta da kieli qazaq sahnasynyń tórinde Roza Qýanyshqyzynyń ónerin tamashalyǵysy keletinin jáne qazaqtyń ónerin álemge tanytqan ánshige tek qana shyǵarmashylyq shabyt pen tabystar tileitinin jetkizdi", — dep atap ótti baspasóz qyzmeti.
Aita keteiik, búgin Astanada ótken baspasóz máslihatynda Roza Rymbaeva Astananyń 20 jyldyǵy mereitoiyna arnalǵan kontserttik baǵdarlamalardan nege kórinbei júrgenin túsindirgen bolatyn.
"Keiingi bes jylda men mádeniet ministrliginiń, prezidenttik apparattyń birde-bir kontsertinde joqpyn. Meni shaqyrady, keiin qońyraý soǵyp, sizdi baǵdarlamadan alyp tastadyq dep aitady. Osy joly da týra solai boldy. "A+" kompaniiasy Naǵima Esqalieva ekeýmizdi áýeli baǵdarlamaǵa qosyp, ertesine habarlasyp, alyp tastadyq dedi. Ne úshin, ne sebepten ekenin aitpaidy", — deidi ánshi.
Rymbaeva merekelik baǵdarlamalarǵa nege shaqyrylmai júrgenin uiymdastyrýshylardyń ózinen suraýdy usynǵan edi.
