Kollaj: Ult.kz
Jaqynda prodiýser Baian Alagózova maqtanyshpen kórsetken «Qyz Jibek» filmindegi kamzolǵa qatysty oqiǵa Mádeniet jáne aqparat ministrliginiń nazaryn aýdardy. Bul týraly Ult.kz habarlaidy.
Alagózova bul ańyzǵa ainalǵan kamzoldy Instagram jelisindegi oqyrmandaryna kórsetip, onyń syilyqqa berilgenin aitty. Dál osyndai qyzǵylt kamzoldy aktrisa Merýert Ótekesheva «Qyz Jibek» filminde basty róldi somdaǵan kezde kigen bolatyn.
"Bul jai ǵana zat emes, men ony ómirimniń sońyna deiin saqtaimyn. Sebebi bul – Merýert Ótekeshevanyń shynaiy kamzoly, oǵan shamamen 50 jyl bolǵan. Bul – Gúlfairýs Ysmaiylovanyń qolynan shyqqan týyndy. Osyndai qundy dúnieniń maǵan buiyrǵanyna óte qýanyshtymyn. Tipti Merýert Ótekeshevamen ólshemimiz de birdei eken", – dedi Alagózova beinejazbasynda.
Mádeniet ministrliginiń málimetinshe, «Qazaqfilm» kinostýdiiasynyń qorynda filmnen qalǵan jalǵyz túpnusqa kamzol saqtaýly. Qazirgi tańda mamandar ekinshi kamzoldyń qaidan shyqqanyn anyqtaýǵa kirisken. Mádeniet jáne aqparat ministrligi bul rekvizittiń asa qundy ekenin atap ótip, «Qazaqfilm» mundai jádigerlerdi saqtaý baǵytynda turaqty jumys júrgizip jatqanyn málimdedi.
"Mádeniet jáne aqparat ministrligi áleýmettik jelilerde talqylanyp jatqan prodiýser Baian Alagózovanyń «Qyz Jibek» filmindegi kiimine qatysty jariialaǵan jazbasyna bailanysty tómendegini habarlaidy.
Birinshiden, «Qazaqfilm» kinostýdiiasynyń mýzei qorynda «Qyz Jibek» filminde paidalanylǵan bir kamzoldyń túpnusqasy saqtaýly. Bul jádiger ulttyq kino óneriniń mańyzdy mádeni murasy retinde qorǵalǵan. Al prodiýser jariialaǵan jazbadaǵy ekinshi kamzoldyń jeke qolǵa qalai ótkendigi anyqtalýda.
Ekinshiden, «Qazaqfilm» kinostýdiiasy ulttyq filmderde paidalanylǵan qundy rekvizitterdi, kostiýmder men basqa da tarihi mańyzy bar zattardy júieli túrde jinaqtap, qalpyna keltirý jáne saqtaý jumystaryn júrgizip keledi. Bul baǵyttaǵy jumys ulttyq mádeni murany keleshek urpaqqa jetkizýge baǵyttalǵan.
Úshinshiden, qazirgi ýaqytta «Qazaqfilm» janynan zamanaýi talaptarǵa sai keletin aýqymdy mýzei ashý josparlanýda. Atalǵan mýzeide otandyq kino tarihyna qatysty biregei eksponattar qoiylyp, kelýshilerge keńinen tanystyrylatyn bolady", - delingen habarlamada.
