Tuńǵyshbai Jamanqulovtyń Qazaqstan Prezidenti Nursultan Nazarbaevqa arnaǵan videoúndeýi jariialandy, - dep habarlaidy Tengrinews.kz tilshisi. Videoúndeý Youtube hostinginde paida boldy. Ait keteiik, video biyl 27 qazanda jazylyp, tek keshe, 7 qarashada jariia bolyp otyr.
"Asa qurmetti prezident myrza, qadirli elbasy, qymbatty Nursultan Ábishuly. Men Tuńǵyshbai Jamanqulov, ózińiz jaqsy biletin Qazaqstannyń halyq ártisi, memlekettik syilyqtyń iegeri, qazaq ónerine hal-haderinshe qyzmet kórsetip júrgen baýyrlaryńyzdyń birimin. Videosuhbat júrgizýge mádeniet ministri Arystanbek Muhamediulynyń meniń tóbeme tóndirip otyrǵan qara bulttary jaily", - dep bastaidy óz sózin Tuńǵyshbai Jamanqulov videoda.
Osydan keiin ol QR mádeniet jáne sport ministri Arystanbek Muhamediulymen qarym-qatynasy, "Feniks" filminen qarajat jymqyrý týraly taǵylǵan aiypqa qatysty, sonymen qatar, "ministrden qysym kórdim" degen Eńlik Sydyqovanyń videosy jaily aitady.
"Prezident myrza, osy iske aralasyp, meni qorǵaýyńyzdy suraimyn. Halyqtyń aldynda abyroiymnyń tógilgenin qalamaimyn. Men sizge osyǵan deiin de hattar joldaǵanmyn, biraq hattar sizge jetpegen kórinedi, sondyqtan videoúndeý jasaýdy uiǵardym", - deidi Jamanqulov.
Al óz kezeginde Tengrinews.kz tilshisine bergen suhbatynda QR mádeniet jáne sport ministri Arystanbek Muhamediuly videoúndeýdiń ýaqytyna, iaǵni onyń qashan túsirilgenine nazar aýdarý kerek ekenin aitty. "Videoúndeýdiń ýaqytyna nazar aýdarý kerek. Bul qai kezde bolǵan. Ózderińiz kórip otyrsyzdar, qylmystyq jaýapkershilikten jaltarý úshin túrli ádisterdi qoldanady. Elestetip kórińizder, jyl boiynda osyndai úndeýlermen, bopsalaýmen reseilik kompaniiaǵa 450 million teńge shyǵarǵysy keldi, al bul sol ýaqytta úsh million dollar edi. Endi ózderińiz sheshim jasai berińizder, ózderińiz kórip otyrsyzdar ǵoi, qandai qysymǵa tótep berýim kerek ekenin kórdińizder. Munyń barlyǵy aqshany syrtqa shyǵarý úshin jasalǵan", - dedi ministr.
Aita keteiik, munyń aldynda mádeniet jáne sport ministri Arystanbek Muhamediuly Tuńǵyshbai Jamanqulovtyń ustalýyna qatysty pikir bildirgen bolatyn. Ministrdiń aitýynsha, Tuńǵyshbai Jamanqulov keshirim suraý úshin arnaiy Astanaǵa kelgen. "Bir apta buryn ol arnaiy kelip, keshirim surady. Isine ókinetinin aitty. Árine, bul másele ońai emes. Uzaq oilandym. Men oǵan kómek kórsetýge daiynmyn (...). Kepil berýge de daiynmyn", - dedi mádeniet jáne sport ministri Arystanbek Muhamediuly.
Eske salaiyq, osyǵan deiin qazaqstandyq akterdiń ustalǵany habarlanǵan edi. Sybailas jemqorlyqqa qarsy is-qimyl ulttyq biýrosy "Feniks" kórkemfilminiń túsirilimderine bólingen qarajattyń jymqyrylǵanyn anyqtaǵan bolatyn
