«Tsifrlyq Qazaqstan» memlekettik baǵdarlamasy aiasynda elimizdiń qasietti nysandary men tarihi jádigerleri 3D formatyndaǵy virtýaldy kartaǵa engizilip jatyr. Bul týraly QR Ulttyq mýzeiiniń baspasóz qyzmeti habarlady.
Osyǵan bailanysty, Qazaqstan Respýblikasy Ulttyq mýzeii «Exponential Kazakhstan» JShS kompaniiasymen kelisimshartqa otyryp, Qazaqstannyń sakraldy obektileri men mýzei qoryndaǵy eksponattardy 3D skanerleý jumystaryn belsendi júrgizýde.
«QR Ulttyq mýzeii mádeni mura eksponattaryn saqtaý úshin olardy tsifrlyq formatqa kóshirý jumystaryn qolǵa aldy. Osy rette, «Qazaqstannyń kieli jerleriniń geografiiasy» jobasy boiynsha birqatar is-sharalar oryndaldy. Jalpy alǵanda mýzei salasyn tsifrlandyrý Qazaqstannyń salt-dástúr, ádet-ǵuryp, tarihi-mádeni jáne ulttyq qundylyqtaryn álemge tanytýǵa yqpal etetin bolady. Maqsat ta osyǵan negizdelgen», – delingen baspasóz habarlamasynda.
Qazirgi tańda Ulttyq mýzeidegi Kúltegin eskertkishiniń 3D formatyn daiyndaý maqsatynda qajetti jumystar jasaldy. Josparǵa sáikes, 2025 jylǵa deiin elimizdegi barlyq mýzeiler tsifrlyq formatqa kóshetin bolady.
Aita keteiik, QR Ulttyq mýzeiinde «Tsifrlyq Qazaqstan» memlekettik baǵdarlamasy aiasynda tsifrlyq platforma quryldy. Onda mýzei qonaqtaryna qazaq eliniń qundy muralaryn aqparattyq tehnologiialar arqyly tanystyrady. Mýltimediialyq zal arqyly qonaqtar tarihi-mádeni muralardyń bárin 3D ponoramalar arqyly kóre alady. Atalǵan joba virtýaldy ekskýrsiia jasaýǵa, 3D sferalyq ponorama qaraýǵa, interaktivti kitaptar oqýǵa múmkindik berip, tsifrlandyrýdyń igilin kórýge jaǵdai jasaidy. Sonymen qatar qala qonaqtary men turǵyndarynyń, týrister qaýymynyń qazaq tarihynan habardar bolýyna óz septigin tigizedi. Mýltimediialyq zal qazaq, orys, aǵylshyn tilderinde qyzmet kórsetedi.
