Nur-Sultan qalasynyń ákimi Altai Kólginov LRT qurylysy jóninde pikir bildirdi, dep habarlaidy QazAqparat.
«LRT boiynsha kóptegen máseleler bar. Munyń óte kúrdeli joba ekenin bilesizder. Joba birneshe jyl buryn bastaldy, kóptegen injenerlik jeliler tartyldy, qyrýar qarajat jumsalǵany túsinikti. Qiyndyqtar «Astana banki» litsenziiasynan aiyrylǵan kezde týyndady. Endi bul qomaqty kapitaldy qajet etetin joba. Sondyqtan qazir pandemiia kezinde banktermen jumys ýaqytsha toqtatyldy, biraq bastapqy ideia – qala ósip, jolaýshylar kóliginiń qosymsha túrlerin engizý qajettigi edi. Iá, shynymen de keibir problemalar boldy. Qazir quqyq qorǵaý organdary tarapynan da sot tergeý jumystary júrip jatyr. Sondyqtan LRT – ońai sharýa emes», - dep jaýap berdi ákim Ortalyq kommýnikatsiialar qyzmetinde tilshi suraǵyna.
A. Kólginov BJZQ men Ulttyq qordyń qarajatyn jobaǵa tartý máselesi qaralmaitynyn aitty.
«Zeinetaqy qorynan da, Ulttyq qordan da qarajat tartý máselesi qaralmaǵan jáne qaralmaidy. Bastapqyda alǵashqy investitsiialyq qarajat Qytai damý bankinen alyndy. Bul – syrttan tartylǵan qarajat. Sondyqtan olar valiýtada qarastyrylǵan», - dep túsindirdi ákim.
Sonymen birge, Altai Kólginov LRT qurylys kezeńderi týraly aityp berdi.
«Men jobanyń tarihymen tanystym – bul birinshi kezeń. Sodan keiin ekinshi kezeń – eski vokzalmen jalǵaý bolatyn. Osyndai úlken josparlar boldy, biraq ekonomikalyq jaǵdaidy eskere otyryp, ekinshi kezeń taqyrybyn áli kótermedik. Biraq birinshi kezeń bastaldy, oǵan qansha infraqurylym salynǵanyn kórip otyrsyzdar. Sodan keiin bul áýejai jolaýshylary úshin ǵana josparlanbaǵanyn túsiný kerek. Qalamyz ulǵaiyp keledi, bes jyl buryn Qabanbai batyr boiynda turǵyn úiler bolmaǵan edi, al qazir qanshama shaǵynaýdan paida boldy», - dep atap ótti ákim.
