Londonda belgisiz bireý politsiia qyzmetkerine machetemen shabýyl jasady. Ofitser aýyr halde jatyr, dep habarlaidy BBC News.
Politsiia qyzmetkerleri Leitonde fýrgondy toqtatpaqshy bolǵanda qolyna machete ustaǵan kólik júrgizýshisi tártip saqshysyna shabýyl jasap, birneshe jerden jaraqattaǵan.
Politseilerdiń sózinshe, tún ortasyndaǵy shabýyl «kenetten ári aiýandylyqpen» jasaldy. Alaida, olar qaskóige qarsy elektr eseńgiretkish paidalanyp úlgergen. Ekinshi ofitser ony birden qolǵa túsirdi.
Zardap shekken politsiia qyzmetkeri aýrýhanaǵa jetkizildi. Qazirgi tańda onyń jaǵdaiy «turaqty aýyr» dep baǵalanýda.
London politsiiasy ofitserler Kýpers-lein jáne Leiton-Hai-roýd jol qiylysynda fýrgondy toqtatýǵa tyrysqanyn málimdedi. Avtokólik toqtamai qoiyp, artynan júrgizýshisi kólikten shyǵyp, politsiia qyzmetkerleriniń birine shabýyl jasaǵan.
50 jastaǵy er adam oqiǵa ornynda dene jaraqatyn keltirgeni úshin kúdikti retinde ustalyp, Londonnyń shyǵysyndaǵy politsiia beketine jaýap alý úshin jetkizildi.
Politsiia bolǵan oqiǵany lańestik áreketke teńeýge negiz joq ekenin málim etti.
