Londonda afroamerikalyq azamat aq násildi jigitti yzaly demonstranttar tobynan alyp shyqty. Bul týraly "Ult aqparat" CNN-ge silteme jasap habarlaidy.
Patrik Hatchinsonnyń janqiiarlyq áreketi túsip qalǵan sýret búkil álemge tarady. Jeksenbi kúni Hatchinson CNN-ge bul onyń qatysqan alǵashqy Black Lives Matter narazylyq sharasy ekenin aitqan.
Eske salaiyq, Londondaǵy jáne búkil álemdegi narazylyq bildirýshiler politsiia qyzmetkerleriniń qolynan qaza tapqan afroamerikalyqtardyń óliminen keiin politsiia jumysyn reformalaýdy talap etip, kóshege shyqty. Qaitys bolǵandardyń qatarynda Minneapoliste kóz jumǵan Djordj Floid pen Atlantadaǵy Reishard Brýks bar. Hatchinson CNN-ge bergen suhbatynda senbide mitingige kelgen kezde, narazy toptyń soqqylarynan ózin qorǵaýǵa tyrysyp, baspaldaqta jatqan aq násildi jigitti kórgenin aitty.
Hatchinson sol sátte bul adam qarsy toptyń ókili ekenine de qaramaǵanyn aitýda. Hatchinson men onyń dostary jaraly azamatty qorshap alyp, sodan keiin Patrik ony politsiia ýchaskesine jetkizý úshin iyǵyna kóterip alǵan. Hatchinsonnyń aitýynsha, soǵan qaramastan narazy top aq násildi adamǵa soqqy jasaýdy toqtatpaǵan.
Hatchinson qutqarǵan er adamnyń aty ázirge belgisiz.
Senbidegi narazylyqtardan keiin politsiia 100-den astam adamdy qamaýǵa aldy.
Patriktiń aitýynsha, ózi narazylyq bildirýge shyqqan. Ol adamzat násildik kemsitýshilikti jeńip, beibit ómir súre alady dep úmittenedi.
«Bárimiz úshin teńdik bolǵanyn qalaimyn. Men – ákemin, atamyn. Balalarym, nemerelerim, jienderim jaqsy álemde ómir súrse eken deimin», - dedi Hatchinson.
Eske sala keteiik, 25 mamyr kúni Djordj Minneapoliste politseilerdiń qolynan qaitys boldy. Ony ustaý barysynda Derek Shovin toǵyz minýttai tizesimen moinynan basyp otyrǵan.
AQSh, Kanada, Ulybritaniia, Germaniia men álemniń basqa da qalalarynda Djordj Floidtyń óliminen keiin narazylyqtar men tolqýlar bastaldy.
