Londonda britaniia jurtshylyǵy uly Abai eńbekterin talqylady. Qazaq oishyly ári aqynynyń 175 jyldyǵyna arnalǵan is-shara Eýraziialyq mádeniet aptalyǵy aiasynda uiymdastyryldy, dep habarlaidy "Ult aqparat".
«Abai murasy tek Qazaqstan halqyna ǵana emes, búkil adamzatqa ortaq. Onyń esimi hám shyǵarmalary aǵylshyn aqyny jáne dramatýrgi Shekspirdiń eńbekterimen bir qatarda turady». Bul - britaniialyq ziialy qaýym ókilderiniń pikiri. Kezdesý barysynda jazýshylar, aqyndar jáne ádebi aýdarmashylar uly oishyldyń shyǵarmalarynan qandai ǵibrat alǵandaryn aitty.
Bestsellerge ainalǵan ǵylymi-kópshilik kitaptardyń avtory, dramatýrg, aqyn, kompozitor jáne ádebi aýdarmashy Djon Farndon: «Abai qoǵamnyń alǵa jyljýy úshin kóp nárse jasady. Ózinen keiin óshpes rýhani mura qaldyrdy. Meniń oiymsha, Abaidyń 175 jyldyǵy qarsańynda onyń shyǵarmashylyǵy týraly Batysta kóbirek aityp, esimin nasihattai berýimiz kerek», - dep atap ótti.
Kezdesýge Eýraziianyń kóptegen elderinen jazýshylar men aqyndar keldi. Qyrǵyzstan, Tájikstan, Resei jáne Moldova memleketteriniń ókilderi Abaidyń ótken ǵasyrda aitqan oilary qazir de ózekti ekendigin ashyp aitty. «Aqyn shyǵarmalary ómirlik qýat beredi jáne oqyrmannyń dúnietanymyn ózgertedi», - atap ótti qonaqtar.
Qazaqstandyq ókilder óz kezeginde Abaidyń 175 jyldyǵyna josparlanǵan mádeni is-sharalar týraly aityp berdi.
«Abaidy zerttep júrgen qazaq ádebietiniń kórnekti ókilderinen basqa, basqa salanyń da myqty ǵalymdary bar. Men osy joly ekonomist Orazaly Sábdenniń aqyndy ózinshe zerttep, Abai álemi arqyly Qazaqstandy qalai joǵary deńgeige kóterýge bolatynyn jazǵan eńbekteri týraly bóliskim kelip otyr», - dedi basqosýda Eýraziialyq shyǵarmashylyq gildiiasynyń múshesi, ádebi agent Baqtygúl Mahanbetova.
