3-shi Qazaqstandyq bitimgershilik rotasy úndistandyq batalon quramyndaǵy BUU-nyń Livandaǵy bitimgershilik missiiasyn jalǵastyrýda.
Pandemiiaǵa bailanysty missiia qolbasshylyǵy virýstyń taralýyn aldyn alý úshin barlyq saqtyq sharalaryn qabyldady, dep habarlaidy "Ult aqparat" QR Qorǵanys minstrliginiń baspasóz qyzmetine silteme jasap.
Qazir Livandaǵy jaǵdai turaqty jáne jergilikti bilik pen «Livandaǵy BUU ýaqytsha kúshteri» qolbasshylyǵynyń baqylaýynda. 26 sáýirge deiin elimizde tótenshe jaǵdai jariialandy. Diplomatiialyq tulǵalardy qospaǵanda, búkil halyq úshin Beirýt áýejaiy, qurlyq jáne teńiz ótkelderi jabyldy.
3-shi Qazaqstandyq bitimgershilik rotasynyń komandiri maior Jánibek Nurlanovtyń aitýynsha, bitimgershilik bazasyndaǵy jaǵdai turaqty.
Missiiadaǵy 11 myń áskeri qyzmetshi men azamattyq bitimgerlerdiń densaýlyq qaýipsizdigin qamtamasyz etý úshin karantin engizildi.
Bitimgerlik bazanyń árbir baqylaý-ótkizý pýnktinde meditsinalyq personal kezekshilik etedi. Bailanyssyz termometriia júzege asyrylyp, sanitarlyq-gigienalyq normalar qatań saqtalǵan.
Bitimgerlerge virýsty juqtyrý faktileri tirkelgen aýdandarǵa sapar jasamaý jáne jergilikti halyqpen bailanysty barynsha shekteý usynyldy. Jeke qurammen koronavirýstyq infektsiiany juqtyrýdyń aldyn alý jáne boldyrmaý boiynsha sabaqtar únemi ótkiziledi.
«Bizdiń aldymyzda turǵan eń mańyzdy mindet – bitimshilerimizdi virýstan qorǵaý. Sonymen qatar, onyń taralýynyń aldyn alý basty maqsattardyń biri, qazirgi ýaqytta bizdiń jumysymyz osyǵan baǵyttalǵan», – dep atap ótti qazaqstandyq kontingenttiń komandiri.
Komandirdiń aitýynsha, qazaqstandyq bitimgerlerdiń moraldyq-psihologiialyq jaǵdaiy da densaýlyqtary da jaqsy. Olar barlyq qaýipsizdik sharalaryn qatań ustana otyra, «kógildir syzyq» boiynda turaqtylyqty qamtamasyz etý úshin 24/7 rejiminde jedel qyzmetti júzege asyrý syndy óz mindetterin oryndaýdy jalǵastyrýda.
Qazaqstandyq bitimgershilik kontingenti modýldik úlgidegi eki bitimgershilik bazada ornalasqanyn atap ótken jón. Kúndelikti jaily jaǵdaiy qalyptasqan. BUU tarapynan qamtamasyz etiletin úsh mezgildik tamaqtaný uiymdastyrylǵan. Dene shynyqtyrýmen ainalysý úshin jabdyqtalǵan sport zaly bar. Mindetterdi oryndaýdan bos ýaqyt kezinde bitimgerler fýtbol, voleibol, shahmat jáne biliard oinaidy. Árkim óz otbasymen beinebailanys arqyly habarlasa alady.
Missiia basshylyǵy qazaqstandyq bitimgerlerdiń jaqsy daiyndyǵy men tártibin atap ótti. Ásirese, olar kólik júrgizýinde erekshelenedi.
