Livanda BUU–nyń 100-ge jýyq áskeri qyzmetshisi koronavirýs juqtyrdy, dep habarlaidy BBC Arabic saity.
Jeksenbi kúni BUU-nyń Livandaǵy ýaqytsha áskeri kúshteri (UNIFIL) 90 sarbazdyń koronavirýs juqtyrǵanyn málimdedi. Málimdemede koronavirýsqa shaldyqqan áskerlerdiń qai eldiki ekeni aitylmaǵan. Alaida olardyń barlyǵy oqshaýlandyrylǵan. BUU-nyń bitimgerlik kúshteri Livanda osy uiymnyń Qaýipsizdik Keńesiniń rezoliýtsiiasyna sáikes 1978 jyldan beri qyzmeti etip keledi. Olardyń basty maqsaty Izrail-Livan demarkatsiialyq shekarasyndaǵy jaǵdaiǵa monitoring júrgizý.
Missiia 6 ai saiyn ýaqytsha mandatyn uzartyp otyrady. UNIFIL kúshteri quramynda búginde 45 memlekettiń 10 myńnan astam sarbazy bar. Missiia quramynda qazaqstandyq áskeriler de qyzmet etedi. Qazaqstannyń 120 sarbazdan qurylǵan KAZBAT bitimgerlik batalony Úndistannyń bitimgerlik batalonynyń quramynda qyzmet etedi.
Qazaqstandyq sarbazdar, jergilikti jaǵdaidy baqylap, baqylaý beketterinde turady. Atysty toqtatý sharalarynyń oryndalý barysy men qarýly kúshterdiń jáne áskeri tehnikanyń ornalasqan jerin baqylaidy.
Sońǵy ýaqytta Livanda COVID-19 virýsymen naýqastanǵandar sanynyń óskeni baiqaldy. Infektsiianyń saldarynan 293 adam qaitys boldy. Eldiń 24 myńǵa jýyq turǵyny koronavirýspen aýyrady.
