Litva parlamenti 20 mamyrdaǵy jiynynda Qytai biliginiń Shyńjańdaǵy uiǵyr, qazaq jáne basqa da musylmandardy qýdalaýyn "genotsid" dep atady. Depýtattar BUU-ny Shyńjańdaǵy lagerlerdi tekserýge, Eýropa komissiiasyn Pekinmen qarym-qatynasty qaita qaraýǵa shaqyratyn qujatty qoldap daýys berdi.
Buǵan deiin AQSh biligi jáne Ulybritaniia, Belgiia jáne Kanada parlamentteri Qytaidyń Shyńjańdaǵy áreketin "genotsid" dep ataǵan.
Litva - postsovettik elderdiń ishinde alǵashqy bolyp Shyńjańdaǵy qysymdy "genotsid" dep otyr. Eldiń premer-ministri Ingrida Shimonite men syrtqy ister ministri Gabrieliýs Landsbergis parlamenttegi jiynǵa qatysqanymen, daýys bergen joq.
"Biz demokratiiany qoldaimyz. Sebebi elý jyl boiy kommýnistik rejimde ómir súrgen kezdegi qiyndyqty eshqashan umytpaimyz" dedi depýtat, rezoliýtsiia avtorlarynyń biri Dovil Sakaliene.
21 mamyrda Qytai syrtqy ister ministriniń ókili Chjao Litszian Pekindegi brifingte "Qytai Litva parlamentiniń qadamyna qarsy shyǵady jáne Vilniýsti qarym-qatynasty buzbas úshin qatesin túzeýge shaqyrady" dedi.
1940-1991 jyldary Sovet odaǵynyń repressiiasynan zardap shekken Litva qazir Eýropa odaǵy men NATO-nyń múshesi. Bul el Reseige jáne Qytai siiaqty kommýnistik elderge diplomatiialyq qysymdardy jii qoldaidy.
BUU men halyqaralyq zertteýshiler 2017 jyldan bastap Qytai Shyńjań ólkesinde millionnan asa uiǵyr, qazaq, qyrǵyz jáne basqa da musylmandardy lagerge qamady dep málimdegen. Quqyq qorǵaýshylar júzdegen myń adamnyń dini rásim jasaǵany nemese sheteldegi tanystarymen bailanys ornatqany úshin negizsiz túrmege qamalǵanyn aitqan.
Qytai Shyńjańdaǵy is-áreketin "terrorizmmen kúres", al lagerlerdi "kásipke baýlityn oryn" dep ataǵan. Pekin batysty Qytaidyń "ishki isine aralasty" dep synaidy.
