Májilis depýtaty Erlan Sairov Úkimet pen Bas prokýratýradan estetikalyq meditsina salasyndaǵy baqylaýdy kúsheitýdi talap etti, dep habarlaidy ult.kz.
Aqtaý men Almatyda liposaktsiiadan keiin naýqastardyń qaitys bolýy qoǵamda úlken rezonans týdyrdy. Depýtattyń aitýynsha, bul jaǵdailar jekelegen oqiǵa ǵana emes, azamattardyń qaýipsizdigine, meditsinalyq qyzmet sapasyna jáne memlekettik baqylaý tiimdiligine qatysty júieli máseleni kórsetedi.
Erlan Sairov 2024 jyly Májilis depýtattary zańsyz meditsinalyq qyzmet, jalǵan mamandardyń kóbeiýi jáne plastikalyq hirýrgiia men kosmetologiia salasyndaǵy baqylaýdyń álsizdigi máselesin kótergenin eske saldy. Sol kezde Úkimet te salada eleýli zańbuzýshylyqtar baryn moiyndaǵan.
«Tek 2023 jyldyń ózinde zańsyz meditsinalyq qyzmet kórsetkeni úshin 674 ákimshilik hattama toltyrylǵan. Al sapasyz kosmetologiialyq jáne plastikalyq protsedýralarǵa qatysty shaǵymdar sany eki esege jýyq ósken. Tekserilgen jaǵdailardyń 60 paiyzdan astamynda zańbuzýshylyqtar anyqtalǵan.
Sonymen qatar búginde Qazaqstanda plastikalyq hirýrgiiamen ainalysatyn shamamen 260 meditsinalyq uiym bar. Al estetikalyq meditsina naryǵy qarqyndy damyp, ainalymy ondaǵan milliard teńgege jetip otyr», – dedi depýtat.
Búginde Qazaqstanda plastikalyq hirýrgiia qyzmetin kórsetetin shamamen 260 meditsinalyq uiym bar. Estetikalyq meditsina naryǵy ondaǵan milliard teńgege jetip, qarqyndy ósip keledi.
Depýtat sońǵy qaiǵyly oqiǵalar máseleniń áli kúnge deiin sheshilmegenin jáne onyń júieli sipat alǵanyn atap ótti. Onyń sózinshe, másele tek jasyryn jumys isteitin kabinetterde emes, litsenziiasy bar jekemenshik meditsinalyq ortalyqtarda da kezdesedi.
«Ádemi jarnama men “jyldam nátije” ýádesiniń artynda óreskel zańbuzýshylyqtar, jaýapsyzdyq jáne adam ómirine nemquraily qaraý jatyr. Mundai jalǵan mamandar dáriger mamandyǵynyń bedeline nuqsan keltiredi», – dedi depýtat.
Sairovty keibir klinikalardyń óreskel zańbuzýshylyqtar anyqtalǵannan keiin qyzmetin basqa ataýmen qaita jalǵastyrýy da alańdatady. Iaǵni, ataýy men zańdy tulǵasy ózgergenimen, mekenjaiy men qyzmetkerleri sol kúiinde qalýy múmkin. Al baqylaýshy organdar úshin bul jańa litsenziiasy bar basqa klinika retinde kórinedi.
Depýtat liposaktsiianyń qarapaiym kosmetologiialyq protsedýra emes ekenin de atap ótti. Mamandardyń pikirinshe, bul – tromboemboliia, mai emboliiasy jáne anafilaktikalyq shok sekildi aýyr asqynýlar qaýpi bar kúrdeli hirýrgiialyq operatsiia.
«Sulýlyq qurbandyqty talap etýi múmkin, biraq ol adam ómirimen ólshenbeýi tiis», – dedi Erlan Sairov.
Sondai-aq depýtat el boiynsha estetikalyq operatsiialardan keiingi asqynýlar men ólim-jitim statistikasynyń ashyq jariialanbai otyrǵanyna alańdaýshylyq bildirdi.
Osyǵan bailanysty ol birneshe usynys aitty:
– plastikalyq hirýrgiia jáne estetikalyq meditsina qyzmetin kórsetetin jekemenshik uiymdarǵa keshendi tekserý júrgizý;
– litsenziia berý tártibin jáne zańbuzýshylyq anyqtalǵannan keiin qaita ashylatyn klinikalardy baqylaýdy kúsheitý;
– estetikalyq operatsiialardan keiingi asqynýlar men ólim-jitim boiynsha ashyq statistika jariialaý;
– áleýmettik jeliler men internettegi mundai qyzmetterdiń jarnamasyn baqylaýdy kúsheitý;
– Bas prokýratýra tarapynan jekemenshik klinikalarǵa aýqymdy tekserý uiymdastyrý.
Depýtattyń aitýynsha, qazirgi jaǵdaida basty másele – azamattardyń ómiri men densaýlyǵyn qorǵaý jáne estetikalyq meditsina salasyndaǵy jaýapkershilikti kúsheitý.
Eske salaiyq, mamyr aiynda plastikalyq ota jasatý kezinde Almaty jáne Aqtaý qalalarynda eki adam qaitys boldy. Olardyń biri 53 jastaǵy bloger Sáýle Bazarhan, ekinshisi 49 jastaǵy aqtaýlyq depýtat Erbol Aitýov liposaktsiia jasatý kezinde kóz jumǵan.
