«Almaty» olimpiadalyq daiarlaý ortalyǵy direktorynyń orynbasary, AIBA Halyqaralyq federatsiiasy komissiiasynyń múshesi Ermahan Ybyraiymov Tokio Olimpiadasyn jeńilgen boksshylarymyzdyń oiynyna taldaý jasady, dep habarlaidy "Ult aqparat".
«Olimpiada oiyndaryndaǵy sportshylarǵa aldańy ýaqytta tek qana jeńis tilei otyryp, 91 kelidegi Vasilii Levittiń oiynyna toqtala keteiin. Vasilii Levit ekinshi raýdta ispandyq sportshynyń soqqysynan qatty nokdaýn aldy. Bul oiyndy óte jaqsy baqylap otyrdym. Ringtegi tóreshi birinshi soqqydan keiin-aq oiyndy birden toqtatyp, nokdaýn sanaý kerek edi. Ringtegi tóreshi momentti jiberip aldy jáne qarsylasyna taǵy soqqy jasaýyna múmkindik berdi. Bul jerde birinshi kezekte ringtegi tóreshini kinálar edim», - dedi Olimpiada chempiony Ortalyq kommýnikatsiialar qyzmetinde brifingte.
Sonymen birge, spiker Levittiń qarsylasy Emmanýel Reies Planyń Ispaniianyń emes, Kýbanyń boksshysy ekenin eske saldy.
«Ol Ispaniianyń azamattyǵyn qabyldap, sol eldiń atynan shyǵyp jatyr. Sondyqtan bul - osal emes, óte myqty boksshy. Jáne Vasilii Levitti esh kinálaýǵa bolmaidy, ol bar kúshin saldy. Endi Levitke aitarymyz, esh eńsesin túsirmei, kelesi jarystarǵa jaqsylap daiyndalýy kerek», - deidi Ermahan Ybyraiymov.
Ermahan Ybyraiymov 69 keli salmaq dárejesinde synǵa túsken Abylaihan Júsipovke tym kóp jaýapkershilik artyldy dep esepteidi.
«Abylaihan Júsipov pandemiia kezinde bir jyl boiy Olimpiada oiyndaryn kútti. Bul psihologiialyq turǵyda óte aýyr. Sodan keiin 69 keli salmaq qazaqtardyń salmaǵy bolyp sanaldy. Odan «altyn» alý paryz siiaqty kórinetin. Qansha degenimen jas boksshy osyndai úlken jaýapkershilikti kótere almady, oiynda óte sylbyr oinady, sozǵan qolymen soqqy jasamady, qashyqty sezinbedi. Tek tóbelese berdi, aiaq jaǵynda amerikalyq boksshydan jeńilip qaldy. Eń basty sebep – úlken jaýapkershilikti kótere almaǵany», - dep baǵalady Ybyraiymov.
81 kelige deiingi salmaqta Bekzat Nurdáýletov te alǵashqy jekpe-jeginde reseilik Imam Hataevtan jeńildi.
«Bekzat Nurdáýletov sozǵan aldyńǵy qolymen múldem oinamady. Ózderińiz kórdińizder, reseilik qarsylasynyń boiy áldeqaida qysqa, ony alstan-aq uryp tastaýǵa bolar edi. Ony Sankt-Peterbýrg qalasyndaǵy jarysta óz elinde jeńgen edi. Bul jerde taǵy aitarym, Olimpiadada psihologiialyq turǵyda óz-ózin ustai almady, sóitip jeńildi. Óte ókinishti. Biraq Qazaqstannan áli tórt bokshysy shyǵady. Sondyqtan, qalǵan boksshyǵa senim artamyz jáne áli de Qazaqstan boksshylary altyn-kúmis ákeledi degen senimimiz mol», - dedi Ermahan Ybyraiymov.
