Otandyq serial óndirýshilerde qandai másele bar? Olar memleketten qandai jeńildik suraidy? Bul suraqqa «Qazaqstan» RTRK» AQ Basqarma tóraǵasy Lázzat Tanysbai jaýap berdi, dep habarlaidy QazAqparat.
«Osydan on jyl buryn tuńǵysh «Aǵaiyndylar» atty serial túsirildi. Ol kezde serial túsirý eshkimniń oiyna kelmeitin edi. Aqan Sataevty barlyǵymyz da kúshtep úgittegenimiz esimde. Biraq, arada 10 jyl ótse de, sol «Aǵaiyndylar» nómiri birinshi serial bolyp qalyp otyr. Bul, árine, bir jaǵynan alańdatady. Nelikten? Biz qarjylandyrý týraly kóp aityp jatyrmyz. Bul rette baǵany eskerý kerek. On jyl buryn eshkim bul salaǵa jaqyndaǵysy kelmegen edi. Al bir ai buryn serial naryǵyndaǵy kompaniialardy jinap kórsek, 15 iri kompaniia jinaldy. 10 jyldyń ishinde naryqtyń qalai damyp ketkenin osydan-aq eseptei berińiz», - dedi Lázzat Tanysbai elordada ótip jatqan Astana Media Week sharasynda.
Onyń aitýynsha, osy jyly birinshi ret Qazaqstan serial naryǵynda detektiv janryndaǵy serial túsirilýde.
«Serial óndirýshilermen máselelerin talqylaǵan kezde eń aldymen bári baǵa jaiyn aitady. Bári de salyqtyq jeńildikti suraidy. Óz kezegimizde telearna tarapynan serial túsirýshilerge degen talaptarymyz, aitar synymyz bar. Men olarǵa «sońǵy jyldary barlyq arnada bir uzyn-sonar melodrama júrip jatqan sekildi» deimin. Sol baiaǵy akterlar – shamamen 10-15 adam barlyq serialda túse beredi. Sol baiaǵy rejisserler. Rejisserdiń stilin tanyp qoiǵannan keiin kórermenniń kórgisi de kelmeýi múmkin. Jýyqta «Abai» serialyna konkýrs jariialadyq. Álbette, bul óte zor jaýapkershilik bolǵannan keiin bul serialdy túsirýden jasqanshaqtap otyrǵan jaiymyz bar», - dedi Lázzat Tanysbai.
«Qazaqstan» RTRK» AQ Basqarma tóraǵasy «Abai» serialy boiynsha konkýrsqa alty kompaniia ǵana ótinish bildirgenin aitady.
«Ol alty kompaniianyń tek bireýinde ǵana tarihi serial túsirý tájiribesi bar eken. Bul bárimiz úshin úlken problema. Bárine iaǵni, tájiribe kerek», - dedi Lázzat Tanysbai.
Eske sala ketsek, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week ótip jatyr.
Astana Media Week-tiń birinshi kúni serialdyq ónimderdi ázirleý jáne shyǵarý taqyrybymen jáne salyq preferentsiialary, kino prokatynyń sharttary, mazmuny, film óniminiń shyǵarmashylyq deńgeii jáne onyń demeýshiler úshin tartymdylyǵy taqyrybymen erekshelenedi.
