Salalyq telearnalardyń máselesi kóterilgen Astana Media Week sharasynda QR Aqparat jáne qoǵamdyq damý ministrligi Aqparat komitetiniń tóraiymy Lázzat Súiindik keiingi jyldary maqsatty aýditoriiasy ósip kele jatqan otandyq telearnalardy atady, dep habarlaidy QazAqparat.
«2010 jyly Elbasynyń tapsyrmasy boiynsha ministrliktiń qoldaýymen «Balapan» telearnasy ashyldy. Ol kezde telearnanyń kórermeni az edi. Qazir jaǵdai basqa. Búgingi tańda «Balapan» telearnasynyń Youtube arnasyndaǵy qaralymdarynyń sany mol. Arna kontentti qazaq tilinde júrgizip otyr. Qazir bizde tyń joba bar. Biz «Mýlt» arnasynyń mýltfilmderin satyp alyp jatyrmyz. Qazirdiń ózinde «Mýlt» arnasynyń 30 paiyzy qazaq tilinde «Balapan» arqyly berilýde. Kelesi jyly «Mýlt» arnasynyń 50-60 paiyzyn qazaq tilinde shyǵarýdy kózdep otyrmyz. Álbette, ózindik ónim kerektigin túsinemiz», - dedi Lázzat Súiindik.
Sonymen birge, komitet tóraiymy otandyq telearnalardyń altyn qory baryn eske saldy.
Onyń aitýynsha, qazaq kinosynyń altyn qory «El Arna» telearnasynyń ashylýyna muryndyq bolǵan.
«Ótken jyly «El Arna» telearnasyn ashý týraly sheshim qabyldandy. Qazirgi ýaqytta mediaólshemder boiynsha ol telearna óziniń maqsatty aýditoriiasyn arttyryp keledi. Búgingi tańda elimizde «Balapan», «Qazsport», «El Arna» telearnalarynyń aýditoriiasy jyl sanap kóbeiýde. Odan bólek, «Tamasha» telearnasynyń ashylǵanyn bilesizder. Iaǵni, Qazaqstanda salalyq telearnalardyń suranysqa ie bolyp jatqanyn baiqap otyrmyz», - dedi ol.
Eske sala ketsek, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week ótip jatyr.
Astana Media Week-tiń birinshi kúni serialdyq ónimderdi ázirleý jáne shyǵarý taqyrybymen jáne salyq preferentsiialary, kino prokatynyń sharttary, mazmuny, film óniminiń shyǵarmashylyq deńgeii jáne onyń demeýshiler úshin tartymdylyǵy, salalyq telearnalar máselesi taqyrybymen erekshelenedi.
