«Otbasy bank» AQ basqarma tóraǵasy Lázzat Ibragimova tolyq emes otbasylardy baspanamen qamtamasyz etý jaiynda pikir bildirdi, dep habarlaidy QazAqparat.
«Tolyq emes otbasylardan ótinish kóp túsip jatyr. Ásirese, «Baqytty otbasy» baǵdarlamasy boiynsha resýrstardyń tapshy bolýyna orai, biyl bizge 51 milliard teńge bólindi. Bul qarajat shamamen 5 myńǵa jýyq otbasyǵa jetedi. Bul rette maýsym-shilde ailarynda 35 myń otbasy ótinish bildirgen», - dedi Lázzat Ibragimova Senattaǵy Úkimet saǵatynda.
Bul turǵyda bank tolyq emes otbasylarǵa jalǵa beriletin turǵyn úidi sýbsidiialaý usynysy týraly aitty.
«Jalǵa alý tólemderin sýbsidiialaý túrinde kómek alýǵa quqyǵy bar sanattardyń tizbesin «tolyq emes otbasylar» sanatymen tolyqtyrý usynyldy», - dedi «Otbasy bank» basshysy.
Onyń aitýynsha, baǵdarlamaǵa tabysy joǵary adamdar qatysa almaidy.
«Bul qadam halyqtyń osy sanatyndaǵylar arasynda áleýmettik shielenisti tómendetedi. Sebebi olar «Baqytty otbasy» baǵdarlamasynan shyǵarylǵanyna áli de narazylyq bildirip jatyr. Degenmen bul sanattaǵy adamdar «Shańyraq» baǵdarlamasy aiasynda qamtylyp otyr jáne 5 paiyzben nesie ala alady», - dedi Lázzat Ibragimova.
