Resei Qyrǵyzstan men Tájikstan arasynda shekara máseleleri boiynsha kelissózde ara aǵaiyn bolýǵa daiyn. Bul týraly Reseidiń syrtqy ister ministri Sergei Lavrov málimdedi.
"Tájikstan men Qyrǵyzstan shekarasy máselelerine toqtalsaq. Ókinishke qarai, jaǵdai alǵash ret ýshyǵyp otyrǵan joq. Biz odaqtas elderdi dialog ornatyp, kúsh qoldanbaýǵa shaqyramyz. Ara aǵaiyn bolýǵa da daiynbiz. Jaǵdai neǵurlym jyldam tynyshtalsa, soǵurlym jaqsy. Biz bul týraly búgin dostarymyzǵa da aittyq" dedi Lavrov Ujymdyq qaýipsizdik sharty uiymyna múshe memleketterdiń SIM jiynynda.
Qyrǵyzstannyń syrtqy ister ministrligi ázirge túsinikteme bermedi.
27 mamyrda qyrǵyz-tájik shekarasynda "Qyrǵyzstan azamaty Tájikstan azamatyna qarai oq atty" degen aqparat shyqqan. Qyrǵyzstannyń shekara qyzmeti máseleni anyqtap jatqanyn habarlaǵan. 24 mamyrda da shekara mańyndaǵy Moinok jaiylymynda kishigirim atys bolǵan.
8 mamyrda shekara mańynda Qyrǵyzstan jáne Tájikstan turǵyndary arasynda qaqtyǵys bolyp, ańshylyq myltyq, minomet qoldanylǵan. Qyrǵyz tarabynan úsh adam, Tájikstannan eki adam zardap shekken.
Qyrǵyz-tájik shekarasynyń jalpy uzyndyǵy – 970 shaqyrym. Qazirge deiin 504 kilometrine bailanysty delimitatsiia jáne demarkatsiia jumystary júrgizilgen. Al shekaranyń kelisilmegen tustary sondaǵy eldi mekenderdegi sý, jer jáne áli anyqtalmaǵan shekarany kesip ótý máseleleri daýǵa jii sebep bolady. Daýdyń sońy janjalǵa ulasyp, taraptar bir-birine tas atady, keide qarýdan oq atady.
