Syrtqy ister ministri Muhtar Tileýberdi Qazaqstanǵa resmi saparmen kelgen Reseidiń Syrtqy ister ministri Sergei Lavrovpen kezdesti, dep habarlaidy Sputnik Qazaqstan.
"Biz ekijaqty yntymaqtastyqtyń damý bolashaǵyn talqyladyq. Ortalyq Aziia, Ýkraina men Taiaý Shyǵysta qaýipsizdikti ornatý máselesi boiynsha ózara pikir almastyq. Ásirese, aldaǵy halyqaralyq dárejedegi sharalarǵa basa nazar aýdardyq. Sebebi Qazaqstan men Reseidiń shekara mańyndaǵy yntymaqtastyǵy ózara saýda-sattyqtyń 70 protsentin alyp otyr. Biz aimaqaralyq yntymaqtastyqtyń XVI forýmyna daiyndyq máselelerin pysyqtap shyqtyq. Osy forým 7 qarashada Omby qalasynda ótedi", - dedi Tileýberdi arnaiy baspasóz máslihatynda.
Ministr Reseimen aradaǵy áriptestik bailanystar Qazaqstannyń syrtqy saiasatynyń basym baǵyty bolyp qala beretinin erekshe atap ótti. Al Reseidiń Syrtqy ister ministri Sergei Lavrov jańadan taiyndalǵan ministrmen alǵash ret kezdesip otyrǵanyn jáne ekijaqty yntymaqtastyqty odan ary jalǵastyrý jaiyn talqylap shyqqanyn jetkizdi.
"Qarashanyń basynda Omby qalasynda XVI aimaqaralyq yntymaqtastyq forýmy ótedi. Onyń aldynda alǵash ret Qazaqstan men Reseidiń jas kóshbasshylarynyń forýmy uiymdastyrylady. Oǵan eki jaqtan syrtqy ister ministrliginiń jas qyzmetkerleri qatysady. Osy oraida jas diplomattardyń ózara tájiribe almasýy tiimdi bolady dep senemiz. Árine, búgin biz energetika, kólik, ǵarysh, bilim men ǵylym salasynda birlesip jumys isteý máselelerin de talqylap shyqtyq", - deidi Lavrov.
Budan bólek, halyqaralyq uiymdar aiasynda ózara úilestirý sharalaryn kúsheitý jaiy da sóz boldy. Ásirese, Eýraziialyq ekonomikalyq odaq aiasynda integratsiia máselelerine basa nazar aýdarylyp, osy uiymnyń áleýetin barynsha paidalaný jaǵy qaraldy.
"Biz Ortalyq Aziia arasyndaǵy bailanystardyń oń dinamikasyn qoldaimyz. TMD elderi syrtqy isteri ministrleriniń keńesi qarsańynda Ashhabadta Ortalyq Aziia bestigi men Reseidiń syrtqy ister ministrleriniń kezdesýi ótedi. Bizdińshe, osyndai beiresmi dialogtyń paidasy mol", - dep atap kórsetti Lavrov.
Sondai-aq, Siriia máselesin retteý salasyndaǵy Astana protsesiniń úlesi sóz boldy.
"Dál osy formatta garant memleketter konstitýtsiialyq komitet aiasynda resmi Úkimet pen oppozitsiia arasyndaǵy naqty kelissózderdiń bastalýyna jaǵdai jasady. Osy organnyń erejeleri kelisildi. Endi, osy kelisimder Birikken ulttar uiymy sheshimderiniń oryndalýyna negiz bolady dep senemiz. Biz soǵan jaǵdai jasaimyz", - dedi Lavrov.
Reseidiń ministri Ýkraina máselesin de talqylaǵanyn jetkizdi. Osy oraida ol Vladimir Zelenskiidiń Minsk kelisimin saqtaitynyna senim bildirdi.
"Jalpy, búgin Qazaqstanda ótken kelissózderge kóńilimiz tolyp otyr. Biz tyǵyz qarym-qatynasymyzdy jalǵastyra beremiz. Men óz áriptesim Muhtar Beskenulyn Reseige saparmen kelýge shaqyrdym", - dep atap kórsetti Lavrov.
