«Qazaqstan Respýblikasynyń keibir zańnamalyq aktilerine qylmystyq protseste azamattardyń quqyqtaryn qorǵaýdy jáne sybailas jemqorlyqqa qarsy is-qimyldy kúsheitý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat".
Zań jobasyna Parlament depýtattary QR Prezidentiniń 2019 jylǵy 2 qyrkúiektegi jáne 2020 jylǵy 1 qyrkúiektegi Joldaýlaryn iske asyrý maqsatynda bastamashy boldy.
Zań jobasynyń maqsaty - azamattardyń quqyqtaryn qorǵaý kepildikterin arttyrý, qylmystyq protseste taraptardyń básekelestigi men teńdigin qamtamasyz etý, sybailas jemqorlyqqa qarsy is-qimyl jónindegi zańnamany jetildirý.
Zań jobasynyń negizgi mindetteri prokýrorǵa adam quqyqtary men bostandyqtaryn qozǵaityn negizgi sheshimderdi kelisý mindetin zańnamalyq júkteý, sondai-aq sybailas jemqorlyqqa qarsy is-qimyldyń jańa quraldaryn endirý arqyly sybailas jemqorlyqqa qarsy zańnamany jetildirý bolyp tabylady.
Zań jobasynda 3 kodeks pen 2 zańǵa ózgerister men tolyqtyrýlar engizý kózdelgen.
Qylmystyq is júrgizý zańnamasyna adam quqyqtary men bostandyqtaryn qozǵaityn sotqa deiingi tergep-tekserý organdarynyń negizgi sheshimderin prokýrormen mindetti túrde kelisý týraly normalar engiziledi, bul qylmystyq protsestiń úsh býyndy modeline kóshýdiń mańyzdy kezeńiniń biri bolyp tabylady. Atalǵan tolyqtyrýlar kúdiktilerdiń (aiyptalýshylardyń) ǵana emes, jábirlenýshilerdiń de quqyqtaryn qorǵaý kepildikterin arttyrady.
Qylmystyq kodekske quqyq qorǵaý organdarynyń qyzmetkerleri men sýdialardy, para berýshiler men deldaldardy sybailas jemqorlyq qylmystar jasaǵany úshin jazalaýdy qatańdatý boiynsha túzetýler engizildi.
Budan basqa, aýyr jáne asa aýyr sybailas jemqorlyq qylmystary úshin sottalǵan adamdarǵa shartty túrde merziminen buryn bosatýdy qoldaný múmkindigin alyp tastaý usynylady.
«Sybailas jemqorlyqqa qarsy is-qimyl týraly» zańda jaýapty memlekettik laýazymdy atqaratyn adamdar jáne memlekettik fýnktsiialardy oryndaýǵa ýákilettik berilgen adamdar (máslihattar depýtattaryn qospaǵanda) men laýazymdy adamdar úshin sheteldik bankterdegi shottarǵa ielik etýi boiynsha sybailas jemqorlyqqa qarsy jańa shekteý engizý kózdelgen.
Zańnamalyq aktilerdegi quqyqtyq olqylyqtardy joiý maqsatynda zań jobasyna redaktsiialyq, naqtylaý sipatyndaǵy basqa da túzetýler engizildi.
