Memleket basshysy Qasym-Jomart Toqaev Reseidiń «Komsomolskaia pravda» gazetine bergen suhbatynda kirillitsadan latyn álipbiine kóshý protsesi týraly aitty, dep habarlaidy QazAqparat.
«Bul úderisti bizdiń Tuńǵysh Prezidentimiz Nursultan Nazarbaev «Rýhani jańǵyrý» tujyrymdamasy aiasynda kóterdi. Ol latyn qarpine kóshýdiń tek qazaq tiline qatysty ekenin, orys tiliniń jaǵdaiyna áser etpeitinin birneshe ret málimdedi. Jańa tehnologiialardyń jedel engizilýine bailanysty jahandyq aqparattyq keńistik te qarqyndy túrde ózgerip keledi. Negizgi aqparattar latyn grafikasyna negizdelgendikten, bizdiń balalarymyz jańa jaǵdaiǵa beiimdelýi kerek», - dedi Prezident.
Prezident qazaq álipbiin jańǵyrtýdyń qazaq tiliniń kommýnikatsiialyq múmkindikterin keńeitý nietinen týyndaǵanyn jetkizdi.
«Sonymen qatar biz Ortalyq Aziia memleketteriniń tájiribesin eskere otyryp, latyn qarpine birtindep kóshemiz. Qoldan jedeldetýge jol berilmeidi. Sebebi, munda kirillitsadan latynǵa jai ǵana kóshý emes, qazaq tiliniń orfografiiasyn qaita qurý jóninde aitylyp otyr. Odan bólek, qazaq ádebietiniń klassikteriniń barlyq mańyzdy eńbekteri kirillitsada jazylǵanyn, kóptegen qazaq urpaqtarynyń kirill álipbiinde bilim alǵanyn jáne qazir de oqyp jatqanyn esten shyǵarýǵa bolmaidy. Asyǵys qadam jasaý mundai úlken iske ziianyn tigizip, shalys bastyrýy múmkin. Sondyqtan bul máseleni aqylǵa salyp, parasattylyqpen sheshý kerek», - dedi Qasym-Jomart Toqaev.
