Foto: instagram.com/nemolchi.kz
Qyzylordada kúieýinen taiaq jep qaza tapqan úsh balanyń anasynyń týystary qylmyskerge jazany qataitýdy, sondai-aq qylmysty ýaqytynda toqtatpaǵan politseilerge qatysty qylmystyq is qozǵaýdy talap etip otyr, - dep habarlaidy Tengrinews.kz agenttigi.
Bul týraly nemolchi.kz qoǵamdyq qory Instagram-da jazba jariialady. Qordyń jazýynsha, qylmys Qyzylorda qalasynyń ortalyǵyndaǵy kafe men politsiia bólimshesi ornalasqan Óserbaev kóshesinde bolǵan. Ol kóshede birneshe dúken men táýlik boiy jumys isteitin agenttikter ornalasqan. Sondyqtan bul qylmysty kóp adamdar kórgen, biraq toqtatpaǵan.
"Ajardyń denesinde kóptegen kógergen, kesilgen jerleri boldy. Qabyrǵasynyń synǵany da anyqtaldy. Onyń denesin asfalt boiymen súiregen bolýy kerek, ústi, shashy balshyq boldy. Al ózderi turatyn bólmeniń edeni qanǵa boialyp jatty. Oǵan ne istegenin oilaýdyń ózi qorqynyshty. Ajar asa qatygezdikpen óltirilgendikten, 99-baptyń 1-bóligin 99-baptyń 2-bóliginiń 5-tarmaǵyna ózgertýdi talap etemiz. Sondai-aq, asa qatygezdikpen óltirgen ólim kezinde áreketsizdik tanytyp, qylmysty jasyrǵany úshin politsiia qyzmetkerlerine Qazaqstan Respýblikasy Qylmystyq kodeksiniń 370-babynyń 4-bóligimen jáne 433-babynyń 3-bóligimen qylmystyq is qozǵaýdy da talap etemiz", - dedi týystary.
Sonymen qatar, týystary politsiiaǵa aryzdanbaǵan, tiisti qyzmetterge habarlaspaǵan dámhana qyzmetkerlerin, quqyq buzýshynyń týystaryn jaýapqa tartýdy suraidy.
Qyzylorda oblysy prokýratýrasynyń baspasóz qyzmeti 3 qyrkúiekte Shádievanyń ólimi boiynsha Qyzylorda qalalyq politsiia basqarmasy QR QK 99-babynyń 1-bóligi ("Adam óltirý") boiynsha sotaldy tergeýdi bastaǵanyn habarlady.
"Tergeý barysynda qylmysqa qatysy bar kúdikti anyqtalyp, tergeý sotynyń sanktsiiasymen oǵan qatysty qamaýǵa alý túrindegi bultartpaý sharasy tańdaldy", - dep atap ótti departamenttiń baspasóz qyzmeti.
Sybailas jemqorlyqqa qarsy qyzmettiń Qyzylorda oblysy boiynsha departamenti politsiia qyzmetkerlerine qatysty Qazaqstan Respýblikasy Qylmystyq kodeksiniń 371-babynyń 1-bóligi boiynsha sotaldy tergeý amaldaryn júrgizip jatqanyn aitty.
