Qyzylorda oblysyndaǵy «SKZ-U» jaýapkershiligi shekteýli seriktestiginde qyzmet atqaratyn 260 adamnyń 99 paiyzy koronavirýsqa qarsy vaktsina saldyrdy, dep habarlaidy QazAqparat.
Seriktestik elimizdegi ýran óndirýshi kompaniialardy kúkirt qyshqylymen qamtamasyz etedi. Óndiris ornynda 260 adam jumys isteidi. Búginde kompaniianyń 3 qyzmetkeri ǵana densaýlyq jaǵdaiyna bailanysty ázirge ekpe saldyrmaǵan.
«Kúkirt qyshqyly zaýyty úzilissiz jumys istep tur. Sondyqtan qyzmetkerlerdiń qaýipsizdigi úshin ekpege qatysty sharalar keń aýqymda jáne keshendi túrde júrgizildi. Ekpe sharalary bastalǵan alǵashqy ýaqytta sanitarlyq-epidemiologiialyq sala mamandaryn zaýytqa arnaiy shaqyrttyq. Bastapqyda olarǵa qoiylǵan saýaldar az bolǵan joq. Dárigerler keńesinen keiin jumysshylar qabyldai bastady», - dedi kompaniianyń óndiristik qaýipsizdik jónindegi bas tehnikalyq jetekshisi Dúisen Shardarbekov.
Kompaniia tarapynan ekpe alǵan árbir qyzmetkerge eki kún demalys pen 15 myń teńge syiaqy berilgen.
Odan ózge ártúrli nominatsiia taǵaiyndalyp, qyzmetkerlerge zattai syilyqtar da tabystalǵan. Tipti zaýyttaǵy qyzmetkerler arasynda ózara jarys uiymdastyrylyp, nátijesinde tolyq ekpe alǵan bólimder de bolǵan.
«Atalǵan sharalar qyzmetkerlerimizdi yntalandyrý úshin jasaldy. Mamandarǵa yńǵaily bolý úshin meditsina qyzmetkerleri vaktsinany zaýytqa kelip saldy. Jumysshylarǵa taǵy bir tiimdi tusy – olardyń aldynda birinshi komponentin jumysta, ekinshisin ózge jerde alamyn degen másele bolǵan joq. Sebebi vahtalyq ádispen bir ai jumys istegendikten eki komponentti de bir jerden aldy», - dedi kompaniia mamany.
Búginde «SKZ-U» JShS-da jumys isteitin 260 qyzmetkerdiń 257-si birinshi komponentin, 253-i ekinshi komponentin saldyrǵan. Al qalǵan úsh qyzmetkerge dárigerler densaýlyǵyna bailanysty ázirge ruqsat bermei otyr.
«Olar densaýlyǵy jaqsarǵan soń alatynyn aitty. Jalpy qyzmetkerlerimiz ózderiniń ǵana emes ujymdastarynyń, sondai-aq týǵan-týystarynyń densaýlyǵy úshin vaktsina alýdyń qanshalyqty mańyzdy ekenin jaqsy túsinedi. Vaktsina alýda belsendi bolýy da osy azamattyq ustanymyn kórsetedi», – dedi D. Shardarbekov.
Qyzylorda oblysy kásipkerler palatasynyń direktory Ǵalymbek Jaqsylyqov óńirde ujymdar arasynda atalmysh máselege qatysty túsindirme jumystary turaqty júrgizilip jatqanyn aitty. Búginge deiin oblysta kásipkerlik sýbektilerinde jumys isteitin 14 myńǵa jýyq azamat vatsina saldyrǵan.
