Foto: Tengrinews.kz
Qyzylordadaǵy mektepterdiń birinde 9 jastaǵy qyzdyń ústine shkaf qulap ketti, - dep habarlaidy Tengrinews.kz saity.
Qyzylordadaǵy jekemenshik mektepte shkaf tórtinshi synyp oqýshysynyń ústine qulap ketti. Ol túrli jaraqattarmen aýrýhanaǵa jetkizildi. Áleýmettik jelide zardap shekken oqýshy qyzdyń anasynyń úndeýi paida boldy.
"Synypta qyzymnyń ústine shkaf qulady. Qazir ol kópsalaly oblystyq balalar aýrýhanasynda aýyr halde jatyr. Mektep ákimshiliginen adamdar kelip, aryzdy qaitaryp alsaq, qarjylai kómek kórsetemiz dedi. Biraq biz bas tarttyq. Qyzymyzdyń jaǵdaiy aýyr, biz ony qalpyna keltirýge qansha ýaqyt pen aqsha ketetinin bilmeimiz. Dárigerler de eshqandai kepildik bermedi. Sondyqtan biz bárin zań aiasynda sheshý kerek dep oilaimyz. Biz aryz jazǵanbyz. Ol jaýapsyz qalmaidy jáne kináliler jazasyn alady dep senemiz", – dep jazdy qyzdyń anasy jelidegi paraqshasynda.
Qyzdyń ákesiniń aitýynsha, barlyq oqiǵa synypta bolǵan. Kenet qulaǵan shkaftyń janynda onyń qyzy men taǵy birneshe balasy turǵan. Zardap shekken qyzdan basqasynyń bári qashyp úlgergen.
"Shkaf óte úlken jáne aýyr bolǵan. Biraq ol eshteńege bekitilmegen bolyp shyqty. Qyzymdy saýyqtyrýǵa mektep ákimshiligi kómektessin", - deidi zardap shekken oqýshy qyzdyń ákesi.
Qalalyq bilim bólimi oqiǵany rastady.
"Búgingi kúni joǵaryda atalǵan ziiatkerlik mekteptiń basshylyǵy zardap shekken balaǵa kómek kórsetip jatyr. Oqiǵaǵa bailanysty qalalyq ishki ister basqarmasy tergeý júrgizip jatyr", - dep atap ótti bilim basqarmasynda.
Oblystyq kópsalaly balalar aýrýhanasy qyzdyń aýyr halde túskenin habarlady.
"Qyzdyń búiregi jaraqattanǵan, qýyq kontýziiasymen aýrýhanaǵa jatqyzyldy. San súieginiń yǵysqan synyǵy, birinshi bel omyrtqasynyń kóldeneń ósindisiniń jabyq yǵysqan synýy diagnozy qoiyldy", - deidi dárigerler.
Politseiler Qylmystyq kodekstiń 140-babynyń 2-bóligi "Kámeletke tolmaǵan balany tárbieleý jónindegi mindetterdi oryndamaý" boiynsha tergeýdi bastady.
"Qazirgi ýaqytta qylmystyq is boiynsha tergeý amaldary júrgizilip jatyr. Qazaqstan Respýblikasy Qylmystyq-protsestik kodeksiniń 201-babynyń talaptaryna sáikes sotqa deiingi tergep-tekserý derekteri jariialanýǵa jatpaidy", - dep qosty politsiia.
