Qyzylorda oblysy Jańaqorǵan aýdanynda jylqylardyń qyrylýyna bailanysty tiisti sala mamandary túsinik berdi, dep habarlaidy "Ult aqparat".
Atalǵan derek alǵash 14 tamyzda tirkelgen. Odan keiin aýdandaǵy Baikenje, Qojakent, Ózgent, Mashbek Nálibaev aýyldarynda jylqy maly belgisiz sebeptermen aýyrǵan. Olardyń keibiri ólim-jitimge ushyraǵan.
«Jergilikti veterinariialyq dárigerler aýrý oshaǵynda boldy. Aýyryp turǵan jylqylardyń klinikalyq belgileri naqtylandy. Ólgen jylqylardyń basyn teksergende gastrofilez qurttary bar ekendigi belgili boldy. Keibir BAQ-da aitylǵan 200 bas jylqynyń ólgendigi anyqtalǵan joq. Jalpy, aýdanda 94 bas jylqy atalǵan aýrýǵa shaldyqqan. Jergilikti veterinariialyq dárigerler 29 jylqynyń ólgenin naqtylady. Qalǵanyn veterinar dárigerler emdep jazyp shyqty», - dedi oblystyq veterinariia basqarmasynyń basshysy Ersultan Ápetov.
Onyń aitýynsha, bul parazitarlyq aýrýlarǵa jatady. Oǵan qarsy is-sharalar mal iesiniń óz qarajaty esebinen júrgizilýi tiis.
«Jylqy gastrofilezi aýrý QR Aýyl sharýashylyǵy ministriniń 2014 jylǵy 30 qazandaǵy buiryǵymen bekitilgen «Janýarlardyń jáne adamnyń densaýlyǵyna qaýip tóndiretin janýarlardy, janýarlarlan alynatyn ónimder men shikizatty mindetti túrde alyp qoiý jáne joiý júrgiziletin kezdegi janýarlardyń asa qaýipti aýrýlar tizbesine» engizilmegen. Sondyqtan mal ielerine ótemaqy qarastyrylmaidy. Taǵy bir aita keterligi, mal ieleri jylqysy aýyryp turǵandyǵy jóninde veterinariialyq dárigerlerge ýaqytyly habarlamaǵan. Bul aýrý bógelek qurttarynan paida bolady. Sondyqtan onyń aldyn alý sharalary júrgizilýi tiis. Olai bolmaǵan jaǵdaida bógelek qurttary jylqy aǵzasynda eresek qurttarǵa ainalady. Emdik sharalardy júrgizý tiimsiz bolady. Onyń sońy ólim-jitimge soqtyrady», - dedi E.Ápetov.
