Búgin oblys ákimi Nurlybek Nálibaev Qyzylorda qalasyndaǵy Jalańtós bahadúr kóshesiniń boiynda ornalasqan «Shuǵyla» sport kesheniniń saltanatty ashylý rásimine qatysty.
Aimaq basshysy turǵyndardy quttyqtap, sport salasyndaǵy jetistikterge toqtaldy.
«Ótken jyly aimaqqa arnaiy saparmen kelgen Memleket basshysy Qasym-Jomart Kemeluly jas sportshylarmen kezdesýinde «Sportpen shuǵyldaný kerek. Ásirese, ózderińiz siiaqty jastarymyzdyń deni saý, myqty azamat bolyp ósýi qajet. Jastardyń deni saý bolsa, memleket te qýatty bolady» degen edi. Sport eldiń mereiin tasytyp, jeńimpazdyq rýh syilaidy, jastardy tabandylyqqa, tártipke baýlidy.
Prezidentimizdiń, Úkimettiń qoldaýynyń arqasynda óńirler arasynda kóshbasshylar qatarynan kórinip kelemiz. «Jaily mektep» ulttyq jobasy aiasynda 12 300 orynǵa arnalǵan 21 mektep salynýda. Byltyr 10 mekteptiń qurylysy bastalsa, biyl taǵy 11 mekteptiń qurylysy júrgiziledi. «Aýyldyq densaýlyq saqtaýdy jańǵyrtý» ulttyq jobasy aiasynda ótken jyly eldi mekenderde 15 jańa dárigerlik ambýlatoriia, 1 meditsinalyq beket el igiligine tabystaldy.
Sporttyq nysandar qurylysy da qarqyn aldy. Qyzylorda qalasynda quny 2 mlrd 700 mln teńge bolatyn ústel tennisi ortalyǵynyń qurylysy júrýde. Syrdariianyń sol jaǵalaýynan halyqaralyq standarttarǵa sai, jabyq basseini bar kópsalaly dene shynyqtyrý-saýyqtyrý kesheniniń qurylysy bastaldy, 10 myń oryndyq jańa stadionnyń irgetasy qalandy. Byltyr 7 dene shynyqtyrý-saýyqtyrý kesheni el igiligine tabystaldy, biyl aýdandarda 15 keshendi qoldanysqa beremiz», – dedi aimaq basshysy.
Rásimde jańa sport keshenin ashyp, jastar men jasóspirimder arasynda salaýatty ómir saltyn qalyptastyrýǵa úles qosqan «Nurai» JShS direktory Seiitqali Alshynbaev oblystyń eń joǵary nagradasy – Qurmet gramotasymen marapattaldy.
Is-sharada memleket jáne qoǵam qairatkeri Murat Baqtiiaruly sóz sóilep, jerlesterin jańa nysannyń ashylýymen quttyqtady.
Sport kesheni 350 oryndyq, 1,7 mlrd teńgege salynǵan, jalpy aýdany – 2700 sharshy metr. Onda taekvondo, horeografiia, ústel tennisi, fýtbol, voleibol, basketbol, qazaqsha kúres, shahmat, toǵyzqumalaq úiirmeleri bolady. Aýmaǵynda shaǵyn fýtbol alańy jáne avtoturaq bar.
Aita keteiik, biyl Syr sportshylary álemdik arenalarda óner kórsetip, oblys qorjynyna 54 medal salsa, respýblikalyq chempionattar men kýboktardan 245 júlde ielendi. Basty jetistik – Qamshybek Qońqabaev bokstan, Aidos Sultanǵali grek-rim kúresinen Parij olimpiadasyna, otyryp oinaý voleibolynan qos birdei sportshymyz Erik Qasqabaev pen Shyńǵys Medeýov paralimpiadaǵa joldama aldy. Dziýdo, paradziýdodan da úmitkerler bar.
