Qyzylordada QR Tuńǵysh Prezidenti kúnine arnalǵan respýblikalyq ǵylymi-praktikalyq konferentsiia ótkizildi, dep habarlaidy QazAqparat.
Búgin oblys ákimi Gúlshara Ábdiqalyqovanyń tóraǵalyǵymen «Tuńǵysh Prezident jáne Táýelsiz Qazaqstan: órkendeýdiń 30 jyly» atty respýblikalyq ǵylymi-praktikalyq konferentsiia ótkizildi.
Konferentsiiaǵa QR Parlamenti Senatynyń depýtaty Murat Baqtiiaruly, oblystyq máslihat hatshysy Naýryzbai Baiqadamov, oblystyq Qoǵamdyq keńestiń tóraǵasy Baqbergen Dosmanbetov, oblystyq ardagerler keńesiniń tóraǵasy Serik Dúisenbaev, belgili ánshi-kompozitor Jeńis Seidýllauly, aitysker aqyn Muhtar Niiazov, aýyr atlet Ilia Ilin qatysty. Sondai-aq, atalǵan jiynǵa ziialy qaýym ókilderi, oblystyq Qazaqstan halqy Assambleiasynyń belsendileri, joǵary oqý oryndarynyń basshylary men ǵalymdary, basqarma basshylary, úkimettik emes uiym ókilderi jáne onlain bailanys arqyly aýdan ákimderi men ziialy qaýym ókilderi keldi.
Aimaq basshysy Syr halqyn QR Tuńǵysh Prezidenti kúnimen quttyqtap, Táýelsiz Qazaqstannyń damý belesinde Elbasynyń róli men jańǵyrý kezeńindegi Syr eliniń jetistigine toqtaldy.
«Barshańyzdy Táýelsiz elimizdiń mártebeli merekesi – Qazaqstan Respýblikasynyń Tuńǵysh Prezidenti kúnimen quttyqtaimyn!. Elbasy kóshbasshylyǵynyń arqasynda saiasi júiesi turaqty, ekonomikalyq áleýeti myqty, ulttyq rýhy berik, halyqaralyq bedeli zor qýatty memleketti qurdyq. Osy jasampaz isterdi Elbasynyń serigi, Prezidentimiz Qasym-Jomart Toqaev júieli túrde júzege asyrýda. Elimiz táýelsizdik jyldary qanshalyqty tolymdy tabystarǵa qol jetkizse, oǵan Syr eli de óz úlesin qosýda. Elbasymyz «Syr - Alashtyń anasy» dep qazaq eliniń alǵashqy astanasy Qyzylorda jaily jyly lebizin bildirgen edi. Ekinshiden, Qyzylorda oblysy - Qazaqstanda ǵana emes álemde ǵaryshtyq keshen ornalasqan strategiialyq mańyzy bar óńir. Úshinshiden, Tuńǵysh Prezidentimizdiń dana saiasatymen halyqaralyq sarapshylar tarapynan «Ǵasyr jobasy» atalǵan Aral teńizin saqtap qalý ideiasy arqyly ekologiialyq apat aimaǵy retinde tarap ketkeli turǵan oblysymyz óz ornyn saqtap qaldy. Tórtinshiden, «Batys Eýropa - Batys Qytai» joly arqyly el men eldi, jer men jerdi jaqyndatty. Bul - barlyq aýdany temirjol men avtokólik jolynyń boiynda ornalasqan Syr óńiri úshin eń tiimdi infraqurylymdyq sheshim», - dedi G. Ábdiqalyqova.
Konferentsiiada Murat Baqtiiaruly, Naýryzbai Baiqadamov, Baqbergen Dosmanbetov, Serik Dúisenbaev Ult kóshbasshysy Nursultan Nazarbaevtyń saiasaty týraly sóz qozǵady.
Sondai-aq, konferentsiia barysynda oblystyq Qazaqstan halqy Assambleiasy tóraǵasynyń orynbasary, nemis etnomádeni birlestiginiń tóraǵasy Irina Shek baiandama jasady. Oǵan qosa Jeńis Seidollauly, Muhtar Niiazov, Iliia Ilin men Talǵat Tiles Táýelsiz Qazaqstandy qalyptastyrý jolyndaǵy azamattardyń úlesi týraly oi qozǵady.
