Qyzylordada quityrqy áreketimen qoǵamdyq rezonans týǵyzǵan alaiaqqa qatysty sot aiaqtaldy, dep habarlaidy Sputnik agenttigi.
Sottalýshy alaiaqtyqty mynadai jolmen jasap kelgen: aýrýhanalar men emhanalardyń janynda jeke taksi júrgizýshilerine kelip, aýyr syrqattan kóz jumǵan týysynyń denesin shalǵai aýylǵa jetkizip berýin ótinedi. Júrgizýshiniń aqysyn marqumnyń aýyldaǵy otbasy tóleitin bolyp kelisedi.
Qyzmet aqysyna qomaqty aqsha usynǵan, sondyqtan kóbisi kelisken. Osydan keiin ol qaitys bolǵan adamnyń denesin tasymaldaýǵa arnalǵan qujattardy rásimdeimin dep aýrýhanaǵa nemese basqa bir meditsinalyq mekemege kirip ketedi.
"Shamaly ýaqyt ótkennen keiin ol taksi júrgizýshisine qaityp kelip, meditsina qyzmetkerine berý úshin qaryzǵa aqsha suraidy, aýylǵa barǵan soń birden qaitarýǵa ýáde etedi, – dep habarlandy Qyzylorda qalasynyń ekinshi sotynda. – Eger oǵan aqsha berse, alaiaq oryndy syltaý taýyp, iz-túzsiz joǵalyp ketetin bolǵan".
Júrgizýshi óz "klientin" biraz ýaqyt kútip, sodan keiin aldanyp qalǵanyn túsinip, politsiiaǵa aryz túsirgen. Alaiaq árdaiym bir ádisti qoldanǵandyqtan tez ustaldy, sonymen qatar meditsinalyq mekemelerdegi beinekameralarǵa birneshe ret túsip qalǵan. Aitpaqshy, ustalǵan er adam óziniń kinásin joqqa shyǵarmady.
"Sot otyrysynda sottalýshy óziniń kinásin tolyǵymen moiyndady, onyń ústine kúdiktiniń kinási zardap shekkenderdiń kýálikterimen, beinebaqylaý kameralarynyń jazbalarymen jáne taǵy basqa is materialdarymen dáleldendi", - dep habarlady Qyzylorda qalasynyń №2 soty.
Sottalýshy Qazaqstan Qylmystyq kodeksiniń 190-baby 3-bóligi 4-tarmaqshasynda (iri kólemde jasalǵan alaiaqtyq) qarastyrylǵan qylmysty jasady dep tanylyp, úsh jylǵa bas bostandyǵynan aiyryldy.
