Qyzylordada 17 jastaǵy jasóspirim sýǵa tunshyqqany beinebaqylaý kamerasyna túsip qalǵan. Ony ádilet polkovnigi qutqaryp úlgergen, dep habarlaidy "Ult aqparat".
Eýraziia arnasynyń habarlaýynsha, Ádilet polkovnigi óle jazdaǵan 17 jastaǵy jasóspirimdi aman alyp qaldy. Kámeletke tolmaǵan jigit tereń basseinge sekirip, súńgimek bolyp, sýǵa tunshyqqan.
Tólegen Tórehan batqan basseinde politsei Shaimerden Esenkeldiev te demalyp jatqan. Ol otbasymen úige qaitýǵa daiyndalyp jatqanda, kenetten áielderdiń aiǵailaǵan daýysyn estidi.
"Basseinniń túbinde batyp jatqan balany kórdim. Tereńdigi – 3 metr. Eshteńe oilamai, sýǵa sekirdim. Ony súirep shyǵaryp, ókpesinen sýdy shyǵaryp bastadym", – dedi Qyzylorda oblystyq qylmystyq júiesi departamentiniń jetekshisi Shaimerden Esenkeldiev.
Jasóspirim tynys almaǵan. Oǵan alǵashqy meditsinalyq kómek kórsetildi. Sonda ǵana oianypty. Tólegen aýrýhanaǵa jetkizildi. Úsh kún reanimatsiiadan jatyp, em aldy. Ol sýǵa sekirip, ózin synamaq bolǵanyn aitady.
"Sekirsem, qorqynyshymdy jeńemin dep oiladym. Júze almaimyn ǵoi. Nátijesin kórdińizder", – dedi qyzylordalyq jasóspirim Tólegen Tórehan.
Tólegenniń anasy Aijan Qarjaýbaiqyzy ulynyń basynan ótken jaǵdaiǵa áli sene almai júr. Uly basseinge dosymen barǵan. Bul júzýge qaýipsiz oryn siiaqty kóringen. Óitkeni munda qutqarýshylar jumys isteidi.
"Balamyz aman-saý, qazir qasymyzda. Bul – biz úshin baqyt. Analyq júregim alǵysqa toly. Balamdy qutqarǵan jandy ómirimniń sońyna deiin umytpaimyn. Qorǵaýshy perishtemizge jáne onyń jaqyndaryna bar jaqsylyqty tileimin", – dedi Tólegenniń anasy Aijan Qarjaýbaiqyzy.
"Qinalǵan janǵa kómektesý kez kelgen qarapaiym adamnyń mindeti dep oilaimyn. Tólegenmen únemi habarda bolyp, toiyn jasap, áskerge jiberemiz dep senemin. Ol qazirdiń ózinde qońyraý shalyp, hal-jaǵdaiymyzdy suraidy”, – dedi Shaimerden Esenkeldiev.
Shaimerden Esenkeldiev jubaiymen segiz bala, iaǵni tórt qyz ben tórt ul tárbielep otyr. Aitýynsha, Tólegen onyń toǵyzynshy balasy siiaqty.
